Vil sýna að ég get enn spilað

Eftir þrettán ár í atvinnumennsku er Sölvi Geir Ottesen kominn aftur heim til Íslands. Að baki er ævintýralegur atvinnumannsferill, þar sem hann spilaði með átta félögum í fimm löndum í tveimur heimsálfum.

„Mér líður vel. Það var löngu ákveðið að ég myndi koma heim á þessum tíma og ég er sáttur við þá niðurstöðu. Ég er feginn að vera kominn heim og ég lít á þennan tíma úti sem mjög góðan og skemmtilegan,“ sagði Sölvi Geir en börnin hans fluttu heim til Íslands fyrir fjórum árum, um svipað leyti og hann samdi við Ural í Rússlandi.

„Það hefur verið langerfiðast við þetta, fjarveran frá börnunum mínum. Það var því orðið tímabært að koma heim,“ sagði Sölvi Geir sem kom hingað til lands í upphafi vikunnar.

Hef enn mikinn metnað

Ljóst er að allflest félög í Pepsi-deildinni hafa áhuga á að fá jafn sterkan leikmann og Sölva Geir í sitt lið. Hann segist þó ekki búinn að ákveða hvar hann muni spila í sumar, en hann hefur til að mynda verið orðaður við FH sem hann æfði með þegar hann var staddur hér á landi í byrjun árs.

„Ég á eftir að fara betur yfir þessi mál. Það hafa verið einhverjar þreifingar í gangi og samtöl við klúbba en ég vil heyra betur hvað þeir hafa að segja. Ég mun svo vega og meta kostina til að sjá hver er bestur fyrir mig í stöðunni,“ segir Sölvi Geir, sem spilaði í yngri flokkum með KA og Víkingi hér á landi en meistaraflokksferilinn hóf hann með síðarnefnda liðinu.

„Það er langt í næsta tímabil og ég hef nægan tíma til að finna út úr þessu. Ég er 33 ára og þarf því kannski ekki að æfa jafn mikið og þessir ungu. En ég hlakka mikið til og hef mikinn metnað til að standa mig hér á landi og sýna að ég geti enn spilað fótbolta.“

 

My time playing abroad as come to an end and I want to thank all the people, teammates, staff, fans, friends and family that took part on this journey with me #djurgården #sønderjyske #fckøbenhavn #fcural #jiangsusainty  #wuhanzall #buriramutd #guangzhourf

A post shared by Sölvi Ottesen (@solviottesen) on Nov 7, 2017 at 3:31am PST

Náði flestum markmiðum

Sölvi Geir hóf atvinnumannsferilinn hjá Djurgården í Svíþjóð en spilaði einnig með SönderjyskE og FCK í Kaupmannahöfn, áður en hann hélt til Rússlands þar sem hann spilaði í tvö ár. Síðustu tvö árin hefur hann verið í Kína, þar sem hann spilaði með þremur félögum, og Taílandi.

„Ég er mjög sáttur við minn feril. Maður getur alltaf hugsað til baka um eitthvað sem hefði getað farið betur en heilt yfir þá er ég mjög sáttur. Ég náði flestum af þeim markmiðum sem ég setti mér sem ungur drengur,“ segir Sölvi Geir sem segir að það hafi verið skemmtileg reynsla að spila í Asíu.

„Það var frábært að fá að fara til Asíu og kynnast fótboltanum þar og menningunni. Þetta er mjög frábrugðið Evrópu, sérstaklega í Kína. Ég upplifði margt skemmtilegt þar – mér tókst að verða bikarmeistari á fyrsta tímabili mínu í Kína og ég verð sennilega taílenskur meistari ef þeir klára leikina sína þar.“

Hann segist nú spenntur fyrir framhaldinu á Íslandi, hvar sem hann muni spila næsta sumar.

„Ég náði ekki að spila lengi í efstu deild áður en ég fór út á sínum tíma, aðeins hálft tímabil. Þetta verður mjög skemmtilegt.“