Herra Fjölnir hættir á tveimur stöðum hjá félaginu en verður samt áfram

Gunnar Már Guðmundsson, leikjahæsti Fjölnismaðurinn í sögu úrvalsdeildar karla, hefur lagt fótboltaskóna á hilluna.

Gunnar Már mun hætta að spila með Fjölni í Pepsi-deildinni en hefur tekið það að sér að vera aðstoðarmaður nýja þjálfarans Ólafs Páls Snorrasonar.

Gunnar hefur spilað 125 leiki fyrir Fjölni í efstu deild eða fleiri en nokkur hann. Hann var einnig markahæsti maður félagsins í efstu deild en missti Þóri Guðjónsson upp fyrir sig í sumar. Þórir er kominn upp í 28 mörk en Gunnar Már skoraði sitt 27. og síðasta mark fyrir Fjölni í úrvalsdeild í sumar.

Gunnar Már náði á sínum tíma að spila með Fjölnisliðinu í 3. Deild, 2. Deild, 1.deild og úrvalsdeild þegar liðið fór upp um þrjár deildir á árunum 2002 til 2008. Hann fékk í framhaldinu viðurnefnið Herra Fjölnir.

Hann fór í víking til FH, Þórs og ÍBV eftir að Fjölnir féll úr deildinni haustið 2009 en snéri aftur í Grafarvoginn fyrir 2014 tímabilið og endaði ferilinn hjá uppeldisfélaginu.

Gunnar verður áfram yfirþjálfari yngri flokka Fjölnis en hann hætti aftur á móti sem aðalþjálfari meistaraflokks kvenna hjá Fjölni.

Ólafur Páll tekur við Fjölni af Ágústi Þór Gylfason sem tók við liði Breiðabliks á dögunum.

„Það er okkur Fjölnismönnum mikil ánægja að hafa fengið Gunna Má í þetta starf. Við bindum miklar vonir við samstarf hans og Óla Palla aðalþjálfara liðsins og þá ekki síst varðandi þjálfun og þróun ungra og efnilegra leikmanna félagsins. Á þessum tímamótum viljum við einnig þakka Gunna Má kærlega fyrir hans framlag inni á vellinum en hann á að baki 258 leiki með meistaraflokki Fjölnis. Einnig viljum við þakka honum fyrir vel unnin störf sem aðalþjálfari meistaraflokks kvenna,“ segir í fréttatilkynningu frá Fjölni.