Bendtner sér um að gera Rosenborg að meisturum í fjarveru Matthíasar

Danski framherjinn hefur heldur betur tekið upp hanskann fyrir okkar mann eftir að Matthías Vilhjálmsson meiddist og missti af restinni af tímabilinu.

Nicklas Bendtner er á góðri leið með að gera Rosenborg liðið að norskum meisturum og gæti tryggt sér markakóngstitilinn í leiðinni.

Matthías Vilhjálmsson hefur ekkert spilað með Rosenborg frá því í lok ágúst. Hann var þá búinn að skora 15 mörk og gefa 6 stoðsendingar í 23 leikjum í deild og bikar.

Nicklas Bendtner var á sama tíma „aðeins“ kominn með 9 mörk og 1 stoðsendingu í 21 leik í deild og bikar. Matthías var þannig sex marka forskot á Danann þrátt fyrir að spila færri mínútur.

Rosenborg þurfti að fá meira frá Nicklas Bendtner eftir að Matthías datt út og það er óhætt að segja að sá danski hafi skilað sínu og gott betur.

Nicklas Bendtner skoraði tvö mörk í 3-0 sigri á Brann um helgina. Hann er þar með kominn með 8 mörk í 6 leikjum síðan að Matthías meiddist. Rosenborg hefur tekið 16 af 18 stigum í boði í þessum leikjum sínum í september og október.

Nicklas Bendtner er nú kominn með 17 mörk í norsku úrvalsdeildinni á þessari leiktíð og er orðinn markahæstur ásamt Ohi Omoijuanfo hjá Stabæk. Björn Bergmann Sigurðarson er þriðji markahæstur með þrettán mörk en hann hefur misst úr leiki að undanförnu vegna að meiðsla.

Rosenborg er með tíu stiga forskot á Björn Bergmann og félaga í Molde þegar aðeins fjórar umferðir eru eftir.  Markatalan er líka mun betri eða +37 á móti +14.