Ekki hægt að heimila umferð minni bíla yfir brúna yfir Steinavötn

Sú ákvörðun hefur verið tekin að heimila ekki akstur minni bifreiða yfir brúna yfir Steinavötn þar sem laskaða brúin stóðst ekki álagspróf. Greint er frá þessu á vef Vegagerðarinnar. Þar segir að álagspróf á brúnni hafi staðið yfir í allan dag en Vegagerðarmenn gerðu sér vonir um að það yrði hægt að leyfa bílum undir 2,5 tonnum að aka yfir brúna.

Svo reyndist ekki vera. Því verður bílaumferð að bíða þess að lokið verði við smíði bráðabirgðabrúarinnar. Áfram verður þó heimil för gangandi yfir brúna.

Vinna við byggingu nýrrar bráðabirgðabrúar hefur gengið mjög vel. Búið er að reka niður alla staura en sett eru upp átta svokölluð ok, en á þeim hvíla síðan stálbitar sem bera að lokum brúargólfið sem ekið er yfir.

Nú þegar er búið að hífa nokkra stálbita á sinn stað og einnig hafa brúarvinnuflokkar Vegagerðarinnar hafist handa við að koma brúargólfinu fyrir á bitunum. Mest allt efni er komið á verkstað sem og starfsmenn beggja brúarvinnuflokka auk fleiri starfsmanna Vegagerðarinnar.

Unnið er einnig af krafti við að leggja veg að nýju brúnni. Miðað við hraðann í verkinu má nú reikna með að hægt verði að opna fyrir umferð allra bíla yfir bráðabirgðabrúna fyrir helgina.