Heimir: Öll lið í heiminum myndu vilja vera með Aron Einar

Heimir Hallgrímsson, þjálfari íslenska landsliðsins, segir að framlag þeirra Arons Einars Gunnarssonar og Gylfa Þórs Sigurðssonar hafi verið gríðarlegt bæði í kvöld sem og í allri undankeppni HM 2018.

Ísland tryggði sér í kvöld sæti í lokakeppni HM 2018 í Rússlandi og varð þar með fámennasta þjóð heims til að gera það í sögu keppninnar.

Á löngum blaðamannafundi eftir leikinn lagði bað Vísir Heimi um að leggja mat sit á frammistöðu Gylfa Þórs og Arons Einars sérstaklega, í ljósi þess hversu mikilvægir þeir hafa verið íslenska liðinu undanfarin ár.

„Það skal ég glaður gera,“ sagði Heimir. „Ef við tökum Gylfa fyrst þá er hann leikmaður sem er einn af okkar mest áberandi leikmönnum. Hann er sá leikmaður sem skorar mikið og leggur upp mörg mörk. Hann er í þeirri stöðu að fá sem mesta athygli.“

„Svoleiðis leikmenn eru oft lúxusleikmenn. En Gylfi er sennilega einn duglegasti maðurinn í liðinu og leggur sig einna mest fram af öllum leikmönnum. Þegar þú ert með svona lúxusleikmann - hver getur leyft sér að vera latur? Hann endurspeglar allt það sem við viljum að leikmenn okkar hafi - hann hefur ef til vill meiri gæði en aðrir en hann er ekki síðri á öðrum sviðum.“

Heimir sneri sér því næst að Aroni Einari, sem spilaði báða leikina í þessari landsliðstörn þrátt fyrir að hafa verið meiddur síðustu vikurnar og settur í erfiða stöðu af félagsliði sínu og þjálfara.

„Öll lið í heiminum myndu vilja vera með leikmann í sínum röðum sem fórnar öllu svo að liðið vinni sigra og næsti leikmaður fái tækifæri til að láta ljós sitt skína. Öll lið í heiminum myndu vilja hafa Aron Einar Gunnarsson í sínu liði. Hann er tilbúinn að setja takkana í andlitið svo að næsti maður geti skorað mark eða fengið fyrirsögnina.“

„Hann er svo hreinn og tær hvað liðsheildina varðar, bæði í hjarta sínu og aðgerðum. Lið keppast um að fá svona leikmenn en við eigum marga svona menn - ekki bara Aron Einar. Það er það sem gerir lið okkar betri en mörg önnur lið. Við eigum fullt af leikmönnum sem eru tilbúnir að leggja allt á sig þó svo að þeir fái ekki sviðsljósið. Ef þú hugsar um Jón Daða, Birki Bjarnason og fleiri - þetta eru vinnudýr sem leggja allt á sig fyrir liðsheildina.“

„Það er þetta hugarfar sem gerir Aron Einar að ekki bara einstökum leikmanni, heldur einstakri persónu.“