Allegri: Alex Sandro er ekki á förum

Svo virðist sem Brasilíumaðurinn Alex Sandro fari ekki til Chelsea í sumar.

Þessi 26 ára gamli vinstri bakvörður hefur verið sterklega orðaður við Englandsmeistarana undanfarnar vikur. Massimiliano Allegri, knattspyrnustjóri Juventus, segir hins vegar að Brassinn fari ekki neitt.

„Alex Sandro er leikmaður Juventus. Hann er frábær og er ekki á förum,“ sagði Allegri eftir sigur Juventus á Roma í æfingaleik í gær.

„Hann hefur bætt sig mikið síðan hann kom hingað og getur haldið áfram að bæta sig. Ég held að hann sé besti bakvörður í heimi ásamt Marcelo,“ bætti Allegri við.

Alex Sandro kom til Juventus frá Porto fyrir tveimur árum og hefur verið í stóru hlutverki hjá ítalska liðinu síðan þá.