Minkur reif hænur Hrafns á hol

Minkur er búinn að útrýma öllu fuglalífi í grennd við bústað Hrafns Gunnlaugssonar á Laugarnestanganum. Kvikmyndagerðarmaður segir tangann undirlagðan af mink. Sem þegar hefur eytt öllu fuglalífi í grennd við bústað Hrafns.

„Hrossagaukur, Spói, Stelkur, Tjaldur, Svartþröstur, Kría, Músarindill, Steindepill - allt horfið,“ segir Hrafn á Facebooksíðu sinni.

Og það sem meira er, tvær hænur sem hann hélt hafa verið rifnar á hol, ungum mönnum til mikillar sorgar.

„Borgin virðist ekki ráða við neitt við minkinn sem leikur sér hér á pallinum með dauða unga, - þótt ég hafi haft samband við borgina slag í slag.“

Morgunblaðið greindi frá því í morgun að minkum sem og öðrum meindýrum hafi fjölgað mikið á höfuðborgarsvæðinu undanfarin misseri. Þetta hefur blaðið eftir Steinari Smára Guðbergssyni meindýraeyði. Steinar Smári segir einnig að músagangur hafi aukist verulega og hann hafi vart undan að eitra fyrir þeirri plágu.