Börn beitt ofbeldi í „hryllingshúsinu“ á Jersey-eyju áratugum saman

Nefnd á vegum breskra yfirvalda sem fengin var til þess að rannsaka vistheimilið Haut de la Garenne á Jersey-eyju leggur til að húsið verði jafnað við jörðu þar sem það sé minnisvarði um skammarlega sögu fyrir marga einstaklinga sem dvöldu á heimilinu sem börn og máttu þar sæta vanrækslu og ofbeldi.

Rannsóknin hófst árið 2008 og hefur kostað um 23 milljónir punda. Hún náði yfir langt tímabil eða frá miðjum fimmta áratug síðustu aldar og fram á þann tíunda en Haut de la Garenne varð vistheimili fyrir börn rétt um aldamótin 1900 og lauk starfseminni árið 1986.

Haut de la Garenne hefur í gegnum tíðina verið kallað „hryllingshúsið“ vegna þeirra aðstæðna sem börnin sem dvöldu þar þurftu að þola en þau komu flest úr bágum félagslegum aðstæðum og áttu um sárt að binda þegar þau komu á vistheimilið.

Þar var hins vegar ekki tekið vel á móti þeim en í umfjöllun Guardian um skýrsluna segir meðal annars að yfirvöld á Jersey-eyju hafi ekki rækt skyldur sínar gagnvart börnunum þar sem hvorki hafi verið pólitískur né faglegur vilji fyrir því að standa vel að málum á heimilinu.

Þannig voru börnin beitt ofbeldi, bæði andlegu og líkamlegu, auk þess sem þau voru vanrækt en öll slík mál voru þögguð niður með þeim afleiðingum að börnin þorðu ekki að segja frá af ótta við að þeim yrði ekki trúað.

„Í stuttu máli er niðurstaðan átakanleg saga af bæði óviðeigandi og árangurslausum afskiptum og afskiptaleysi hins opinbera. Börn voru stundum tekin frá fjölskyldum sínum án tilhlýðandi raka eða fyrir tilviljun að því er virðist,“ segir í skýrslunni auk þess sem rannsóknin leiddi í ljós að fjöldi barna hafði á níunda og tíunda áratugnum ekki fengið viðhlítandi aðstoð í velferðarkerfinu.

„Þegar börn fóru af vistheimilinu sem unglingar fengu þau ekki viðhlítandi aðstoð til að koma undir sig fótunum.“