Albert Brynjar skaut Selfyssinga í kaf | Markalaust í Breiðholtinu

Albert Brynjar Ingason skoraði bæði mörk Fylkis í 2-0 sigri á Selfossi í Inkasso-deildinni í kvöld.

Albert er nú kominn með fimm mörk í sumar og er næstmarkahæstur í deildinni. Frammarinn Ivan Bubalo er markahæstur með sex mörk.

Albert kom Fylki yfir á 28. mínútu og hann bætti svo öðru marki við fimm mínútum fyrir hálfleik. Fleiri urðu mörkin ekki og Árbæingar fögnuðu góðum sigri.

Með sigrinum náði Fylkir þriggja stiga forskoti á toppi deildarinnar. Selfoss, sem hefur tapað tveimur af síðustu þremur leikjum sínum, er í 4. sætinu með 13 stig.

Í hinum leik kvöldsins gerðu Leiknir R. og Haukar markalaust jafntefli.

Þessi lið eru jafntefliskóngar deildarinnar en þau hafa bæði gert fjögur jafntefli í sumar.

Leiknir R. og Haukar eru jöfn að stigum í 6. og 7. sæti deildarinnar.

Upplýsingar um úrslit og markaskorara eru fengnar frá Fótbolta.net.