Ramos: Áttum stefnumót við söguna

Sergio Ramos lyfti Evrópubikarnum eftir 1-4 sigur Real Madrid á Juventus í úrslitaleik Meistaradeildar Evrópu í kvöld.

Þetta er þriðja sinn á fjórum árum sem Ramos verður Evrópumeistari með Real Madrid. Þáttur hans í þessum þremur Evrópumeistaratitlum er ekki lítill en hann skoraði t.a.m. í úrslitaleikjunum gegn Atlético Madrid 2014 og 2016.

„Við erum ótrúlega stoltir af þessu liði,“ sagði Ramos og gerðist svo skáldlegur.

„Við áttum stefnumót við söguna. Við vildum virkilega vinna þetta og afreka það sem engum hafði áður tekist; að vinna Meistaradeildina tvö ár í röð,“ bætti Ramos við.

Ramos hefur verið í yfirvinnu við að lyfta bikurum síðan hann tók við fyrirliðabandinu hjá Real Madrid af Iker Casillas sumarið 2015.

Á þessum þremur árum hefur Real Madrid tvívegis unnið Meistaradeildina, einu sinni orðið spænskur meistari, unnið heimsmeistarakeppni félagsliða og Ofurbikar Evrópu.