Goðsagnir í hverri stöðu þegar FH og Valur mættust síðast í úrslitum

FH og Valur mætast í fyrsta leik í úrslitum Olís-deildar karla í Kaplakrika í kvöld. Leikurinn hefst klukkan 20:15.

Tuttuguogfjögur ár eru liðin síðan liðin mættust síðast í úrslitum um Íslandsmeistaratitilinn.

RÚV birti í dag skemmtilegt myndbrot úr fjórða leik liðanna 1993. Valsmenn mættu þá í Kaplakrika, unnu 21-23 sigur og tryggðu sér Íslandsmeistaratitilinn.

Valsmenn urðu einnig deildar- og bikarmeistarar þetta tímabil og unnu því þrefalt. Valur vann svo Íslandsmeistaratitilinn næstu þrjú ár.

FH og Valur voru bæði með ógnarsterk lið á þessum tíma og þegar rennt er yfir byrjunarliðin úr fjórða leiknum 1993 má sjá ýmis kunnugleg nöfn.

Af þeim 14 leikmönnum sem byrjuðu leikinn eiga 13 þeirra a.m.k. níu landsleiki fyrir Íslands hönd. Sá eini sem á ekki landsleik er Alexei Trúfan sem er af rússnesku bergi brotinn.

Í liðunum voru t.a.m. samtals sex leikmenn sem hjálpuðu Íslandi að vinna B-keppnina í Frakklandi 1989: Geir Sveinsson, Valdimar Grímsson, Guðmundur Hrafnkelsson, Jakob Sigurðsson, Kristján Arason og Þorgils Óttar Mathiesen.

Í liði Vals voru einnig ungstirnin Ólafur Stefánsson og Dagur Sigurðsson, þá tvítugir að aldri. Allir þekkja svo þeirra sögu í handboltanum.

Leikmennirnir sem byrjuðu fjórða leik FH og Vals 1993 spiluðu samtals hvorki fleiri né færri en 2603 landsleiki, samkvæmt heimasíðu HSÍ.

Byrjunarlið FH var þannig skipað (landsleikir í sviga):

Markvörður: Bergsveinn Bergsveinsson (153) - 16/2 varin skot

Vinstra horn: Gunnar Beinteinsson (85) - 3 mörk

Vinstri skytta: Alexei Trúfan - 3/2 mörk

Leikstjórnandi: Guðjón Árnason (43) - 9 mörk

Hægri skytta: Kristján Arason (245)

Hægra horn: Sigurður Sveinsson (9) - 4 mörk

Línumaður: Þorgils Óttar Mathiesen (247)

Aðrir markaskorarar:

Hálfdán Þórðarson (línumaður) - 2 mörk

Byrjunarlið Vals var þannig skipað - mörk skoruð:

Markvörður: Guðmundur Hrafnkelsson (407) - 17/2 varin skot

Vinstri bakvörður: Jakob Sigurðsson (247) - 1 mark

Vinstri skytta: Ingi Rafn Jónsson (11) - 3 mörk

Leikstjórnandi: Dagur Sigurðsson (215) - 3 mörk

Hægri skytta: Ólafur Stefánsson (330) - 5 mörk

Hægra horn: Valdimar Grímsson (271) - 5/4 mörk

Línumaður: Geir Sveinsson (340) - 6 mörk

Úrslitaeinvígi FH og Vals um Íslandsmeistaratitil karla í handbolta hefst í kvöld. Það eru 24 ár síðan liðin mættust síðast í úrslitum. pic.twitter.com/NXy63Czt7p

— RÚV Íþróttir (@ruvithrottir) May 10, 2017