Kílómetri á milli Subway-staða í miðbænum

Nýr veitingastaður Subway mun opna við Laugaveg 86 á næstu vikum. Veitingastaðurinn er einnig við Bankastræti 14 og verður því innan við kílómetri á milli Subway-staða í miðbænum.

Veitingastaðirnir verða orðnir 24 talsins eftir opnunina. Þá hefur Subway Fitjum í Reykjanesbæ verið stækkaður um helming og hefur nú verið opnaður að nýju eftir miklar endurbætur, að því er segir í tilkynningu frá fyrirtækinu.

„Stækkunin var liður í að bæta þjónustu á svæðinu og mæta mikilli aukningu á aðsókn. Við sjáum aukna aðsókn undanfarna mánuði með auknum straumi ferðamanna til landsins. Margir ferðamenn koma hingað á ferð sinni til og frá Leifsstöð,“ segir Fríða Ásgeirsdóttir, markaðsstjóri Subway í tilkynningunni.  „Að auki mun Subway opna glænýjan veitingastað á Laugavegi í miðborg Reykjavíkur innan skamms.“