„Við vorum sekúndum frá mannskæðu stórslysi“

„Ég er enn á lífi. En, þetta var svakalegt,“ segir Andri Sigurðsson sem lenti heldur betur í honum kröppum í gær. Hann kom til Íslands með flugi 6F108 frá Alicante til Keflavíkur.

Rauði Kross Íslands ásamt Primeraair hefur nú boðið farþegum í því flugi upp á sérstaka áfallahjálp sem fram fer í dag klukkan 17. Eins Vísir greindi frá í gær hlekktist flugvélinni á í lendingu og rann fram af brautinni.

„Flugvélin beygði frá ljósunum við enda vallarins. Gott hjá flugmönnum vélarinnar og sem náðu að bremsa í mölinni,“ segir Aðalsteinn Örnólfsson alþjóðlegur golfdómari sem einnig var í vélinni.

Svo vill til að blaðamaður Vísis var einnig með í þessu flugi en hann var í hópi sem var að koma frá þátttöku í árlegu golfmóti Íslendinga á Spáni – Costablanca Open. Aðflugið var hið einkennilegasta, vélin var þegar orðin klukkutíma á eftir áætlun. 

Farþegum var ljóst að skyggni var mjög slæmt og seinna kom á daginn að á Suðurnesjum var hríð. En, það er ekkert nýtt þegar flugaðstæður á Íslandi eru annars vegar. Vélin ætlaði niður en tók sig svo upp aftur. Og reyndi svo lendingu á ný eftir annað aðflug.

„Maður kallar ekki allt ömmu sína en ég var bara virkilega hræddur,“ segir Hreimur Örn Heimisson söngvari en hann var einnig í vélinni auk Vignis Snæs, en þeir voru að koma frá því að skemmta hópnum sem var á golfmótinu.

Vélin átti aldrei að lenda við þessar aðstæður

Hún virtist koma alltof hratt inn til lendingar. Einn farþega í flugvélinni, Engilbert Runólfsson verktaki, er afdráttarlaus í tali. Hann telur ótrúlega meðvirkni og þöggun í gangi hjá öllum viðkomandi gagnvart þessu „atviki“.

„Það er bara látið eins og vélin hafi „bara runnið aðeins útaf“ þegar raunin er sú að við vorum örfáum sekúndum frá hugsanlega mannskæðu stórslysi,“ segir Engilbert og bendir á að flugstjórinn hafi átt fullt í fangi með að stöðva vélina. 

„Og þurfti að keyra hana yfir malarlagt öryggissvæði til að fá grip með knývendana algjörlega í botni. Ég heimta að fá að vita hvað gerðist þarna, ekki bara einhvern sálfræðing þremur tímum eftir „atvikið“ til að segja okkur að vera ekkert að hugsa um þetta eða hlusta á einhverjar getgátur.“

Engilbert segist þekkja marga flugmenn sem kvarta undan niðurskurði í „de-icing“ á Keflavíkurflugvelli eftir að herinn fór sem geri völlinn mjög varasaman þegar aðstæður breytast skyndilega eins og í gær.

„Þessi vél sem við vorum í átti aldrei að fá að lenda á þessari braut við þessar aðstæður, aldrei! Einnig kom hún alltof hratt inn til lendingar. Hvað fór úrskeiðis vil ég fá að vita hratt og örugglega,“ segir Engilbert.

Fjölmörgum spurningum ósvarað

Farþegar segja ótal spurningar útistandandi, líkt og Engilbert kemur inná, sem rannsóknarnefnd flugslysa stendur nú frammi fyrir. Óútskýrð klukkustundarseinkun var á fluginu frá Alicante sem hafa vakið upp grunsemdir hvort flugvélin hafi verið í stakk búin til að hefja sig til flugs.

Engilbert, sem er áhugamaður um flug þó hann teljist ekki sérfræðingur, segir furðulegt hversu lengi hún var að hefja sig til flugs á flugvellinum í Alicante.

„Ég veit líka ekki hvort fólk tók eftir því í flugtaki í Alicante að flugtaksbrunið var óvenjulega langt, vélin alls ekki full og þar af leiðandi ekki of þung. Mjög óvenjulegt, ég sagði við sjálfan mig; farðu nú að koma druslunni á loft maður. Spurningin er, var allt í standi með vélina?“

Flugvallarmál í KEF í ólestri

Víst er að flugmál í Keflavík virðast í hinum mesta ólestri. Til að mynda tók það hluta hópsins þrjá tíma að „tékka“ sig inn á leiðinni út til Spánar. Var flugvöllurinn í Keflavík ekki í stakk búinn til að taka á móti flugvélinni þegar hún kom til lendingar í gær og vildi vísa henni annað, en það ekki í boði? Var flugvélin orðin bensínlaus eftir fjögurra tíma flug, eins og rætt var meðal farþega eftir slysið, og gat því ekki farið á varaflugvöll svo sem til Egilsstaða eða Skotlands? Flugvélar hafa áður lent í hríð á Keflavíkurflugvelli, var vélin biluð eða réðu mannleg mistök því að vélin skautaði út af vellinum?

Einn farþega fullyrðir að starfsmaður Isavia, sá sem tilkynnti hvenær vænta mætti farangursins, hafi sagt að vélin hefði ekki haft nægt eldsneyti til að fljúga á varavöll eða til að hringsóla á meðan brautin væri hreinsuð betur. Og má heita mjög alvarleg sparnaðaraðgerð að hálfu Primera air, ef rétt reynist.

Þá má og nefna mikla óánægju meðal farþega sem snýr meðal annars að því að þeim var gert að bíða í þrjá til fjóra klukkutíma eftir farangri sínum en var hins vegar tilkynnt um að hann væri væntanlegur innan tíðar. Ef það hefði legið fyrir að hann væri ekki væntanlegur fyrr hefðu ef til vill einhverjir kosið að vitja hans síðar og hverfa heim við svo búið.