Samherji Jóhanns Berg fyrirliði Íra í kvöld

Robbie Brady leiðir írska landsliðið út á Aviva-völlinn í Dublin þegar það mætir því íslenska í vináttulandsleik í kvöld.

Brady ber fyrirliðabandið í fjarveru Seamus Coleman sem fótbrotnaði illa í leik Írlands og Wales á föstudaginn.

Brady, sem er uppalinn hjá Man­chester United, er dýrasti leikmaður í sögu Burnley en hann gekk í raðir liðsins frá Norwich City í janúar.

Brady er samherji Jóhanns Berg Guðmundssonar hjá Burnley en þeir félagar mætast þó ekki í kvöld því Jóhann Berg er meiddur og ekki í íslenska landsliðshópnum.

Brady hefur leikið 31 leik fyrir írska landsliðið og skorað sjö mörk.