Starfsmenn hafi möguleika á launuðu fríi einum mánuði fyrir settan dag

Bæjarráð Hveragerðisbæjar samþykkti á fundi sínum á fimmtudag að barnshafandi starfsmenn hafi möguleika á launuðu fríi einum mánuði fyrir settan fæðingardag. Bæjarstjóri segir þetta mikilvæga leið til þess að koma á móts við konur sem sinni erfiðum störfum hjá bæjarfélaginu.

Ákvörðunin bæjarráðs var samþykkt samhljóða og tók fyrirkomulagið þegar gildi en fæðingardagur skal staðfestur með læknisvottorði og ber starfsmanni að tilkynna yfirmanni eins fljótt og kostur er hvort hann hyggst nýta sér þennan rétt.

Hveragerðisbær er stærsti vinnuveitandi bæjarfélagsins með um tvö hundruð starfsmenn.

„Bæjarráð og bæjarfulltrúar hafa lengi haft áhuga á að gera eins vel og kostur er við starfsmenn bæjarins og við erum með starfsmannastefnu sem ða við förum eftir og þessu hugmynd kviknaði nú einfaldlega í ljósi þess að bæjarbúum er að fjölga. Það eru óvanalega mörg börn í bænum núna og þá fórum við að velta þessu fyrir okkur hvort við gætum með einhverju móti komið til móts við okkar starfsmenn og þetta er leið sem við viljum fara til þess,“ sagði Aldís Hafsteinsdóttir, bæjarstjóri í Hveragerði.

Aldís segir að einhver kostnaður komi til með að verða til vegna fyrirkomulagsins

„Við sjáum samt að það er að gerast að konur far í veikindafrí, þær fara í frí aðeins fyrir fæðingu og við viljum bara koma á móts við þá þróun með þessum hætti,“ segir Aldís.

Í bókun bæjarráðs kemur fram að starfsmenn bæjarins vinni afar mikilvæg og krefjandi störf sem flest hver felast í líkamlegri eða andlegri áreynslu og að þetta sé leið bæjarins til að koma létta undir þar sem hægt er.

Aldís segir Hveragerðisbæ vera fyrsta bæjarfélagið til að taka upp þetta fyrirkomulag.

„Ég held að algjör nýbreytni og vona auðvitað að aðrir fylgi í kjölfarið og sérstaklega fyrirtæki í Hveragerði,“ segir Aldís.

Með ákvörðun bæjarráðs segist Aldís ekki hafa áhyggjur af því að bæjarstarfsmenn fari allir í einu að eignast börn.

„Það væri afskaplega gleðilegt ef það mundi gerast,“ segir Aldís.