24,5 milljarða kröfur í þrotabú Magnúsar

Tryggvi Páll Tryggvason skrifar 7. mars 2017 13:20

Samþykktar kröfur í þrotabú Magnúsar Þorsteinssonar nema alls 24,5 milljörðum. Gjaldþrotaskipti hafa tekið tæp átta ár en Magnús var úrskurðaður gjaldþrota árið 2009. Mbl.is greinir frá.

Magnús var úrskurðaður gjaldþrota í maí 2009 í Héraðsdómi Norðurlands eystra. Hæstiréttur staðfesti úrskurðurinn mánuði síðar.

Straumur-Burðarás fjárfestingarbanki krafðist þess að Magnús yrði tekinn til gjaldþrotaskipta. Ástæðan fyrir gjaldþrotakröfunni var sú að fjárfestingafélagið BOM ehf tók tæplega tólf hundruð milljón króna lán til þess að kaupa hlut í Icelandic Group. Lánið var veitt árið 2005.

Upprunalegir lántakendur voru þeir Baldur Guðnason og Steingrímur H. Pétursson, eigendur Sjafnar. Árið 2007 keypti Magnús BOM og skrifaði undir sjálfskuldarábyrg upp á 930 milljónir króna.

Athygli vakti að Magnús breytti um lögheimili rétt áður en mál hans var dómtekið á Akureyri og fluttist til Rússlands. Þvertók hann þó fyrir að tengsl væru á milli þess og dómsmálsins.

Magnús var áberandi í viðskiptalífinu hér á landi á árunum fyrir hrun. Magnús var stjórnarformaður og aðaleigandi Avion Group sem átti meðal annars Air Atlanda. Þá keypti hann Landsbankann ásamt Björgólfi Guðmundssyni og Björgólfi Thor Björgúlfssyni.

Þann 20. mars næstkomandi verður haldinn skiptafundur í þrotabúi Magnúsar. Þar fá kröfuhafar lokatækifæri sitt til þess að andmæla skiptunum.

Tengdar fréttir

Hæstiréttur staðfestir gjaldþrot Magnúsar Þorsteinssonar

Hæstiréttur Íslands staðfesti gjaldþrotabeiðni Straums Burðarás á hendur Magnúsi Þorsteinssyni vegna tæps milljarðs sem hann gekkst í ábyrgð fyrir hjá félaginu BOM ehf.

3. júní 2009 17:45

Magnús gjaldþrota - flóttatilraunin misheppnaðist

Bú auðmannsins Magnúsar Þorsteinssonar verður tekið til gjaldþrotaskipta en úrskurður þess efnis féll í héraðsdómi Norðurlands eystra fyrr í dag. Straumur-Burðarás fjárfestingarbanki krafðist þess að Magnús yrði tekinn til gjaldþrotaskipta en Magnús sagðist geta staðið undir skuldum sínum við bankann. Magnús flutti einnig lögheimili sitt til Rússlands frá Akureyri rétt áður en krafan var tekin fyrir.

4. maí 2009 14:03

Flutti til Rússlands rétt fyrir kyrrsetningu

Auðmaðurinnn Magnús Þorsteinsson færði lögheimili sitt út til Rússlands stuttu áður en gjaldþrotamál Straums Burðarás gegn honum var tekin fyrir í Héraðsdómi norðurlands eystra. Það var lögfræðingur sóknaraðila, Gísli Guðni Hall sem benti á þetta í aðalmeðferð málsins sem fór fram í morgun.

30. apríl 2009 12:35

Mest lesið

Fleiri fréttir