Magnús: Flutningur til Rússlands kemur gjaldþrotamáli ekki við

Magnús Þorsteinsson fjárfestir segir að flutningur lögheimili hans til Rússlands á dögunum komi gjaldþrotamáli hans á Íslandi ekkert við. Hann hafi ekki vitað af gjaldþrotaskiptabeiðni á hendur honum þegar hann ákvað að flytja lögheimili sitt. Í yfirlýsingu frá Magnúsi og lögmanni hans segir hann aðgerðir Straums gegn sér tilhæfulausar og ómaklegar en Héraðsdómur Norðurlands eystra úrskurðaði Magnús gjaldþrota á dögunum.

„Krafa Straums Burðaráss fjárfestingarbanka hf. um gjaldþrotaskipti á búi Magnúsar Þorsteinssonar er byggð á áranguslausri kyrrsetningargerð sem fram fór hjá sýslumanninum á Akureyri að kröfu Straums vegna meintrar skuldar Magnúsar við bankann upp á tæpar 1.200 milljónir króna. Magnús hefir mótmælt því að krafa Straums á hendur honum sé gild," segir meðal annars í tilkynningunni.

„Mál er rekið fyrir dómstólum um gildi þessarar meintu skuldar Magnúsar sem er til komin vegna ábyrgðaryfirlýsingar sem Magnús gaf til tryggingar á láni sem Straumur hafði lánað til fyrirtækis í eigu aðila óskildum Magnúsi, nokkrum árum áður en ábyrgðaryfirlýsing Magnúsar var veitt," segir ennfremur og því bætt við að ekki sé rétt sem komið hafi fram í sumum miðlum að Magnús hafi sjálfur stofnað til lánsins.

Óvenjulegt harðfylgi

„Samkvæmt ákvæðum laga um kyrrsetningu er það ekki skilyrði kyrrsetningar að gerðarbeiðandi, í þessu tilviki Straumur, leiði sönnur að réttmæti kröfu sinnar, en þó skal sýslumaður synja um kyrrsetningu ef ætla verður af fyrirliggjandi gögnum að gerðarbeiðandi eigi ekki þau réttindi sem hann ætlar að tryggja. Af þessum ástæðum fer kyrrsetning yfirleitt fram ef hennar er krafist og hugsanlegt er að krafa gerðarbeiðanda sé fyrir hendi. Enginn málflutningur fer fram hjá sýslumanni eða nánari rannsókn á réttmæti kröfunnar. Sýslumaðurinn á Akureyri ákvað að gerðin skyldi fara fram og Magnús gat ekki bent á eignir til tryggingar þessari gríðarlegu fjárhæð."

Þá segir að samkvæmt ákvæðum gjaldþrotaskiptalaga geti lánardrottinn krafist þess að bú skuldara sé tekið til gjaldþrotaskipta ef kyrrsetning hefur farið fram í eignum hans án árangurs að einhverju leyti eða öllu. „Eins og komið hefur á daginn vill Straumur augljóslega ekki bíða eftir niðurstöðu héraðsdóms í máli þar sem fjallað er um réttmæti kröfunnar og málsástæður varnaraðila og neytir því þessa úrræðis," segja Magnús og lögmaður hans Benedikt Ólafsson.

„Þetta er óvenjulegt harðfylgi af hálfu kröfuhafa og að mati Magnúsar tilhæfulaust og ómaklegt," segja þeir og bæta við að verið sé að skoða niðurstöðu héraðsdóms og gjaldþrotaúrskurð og eru líkur á því að úrskurðurinn verði kærður til Hæstaréttar. Kærufrestur er tvær vikur.

Lögheimili kemur gjaldþrotamálinu ekkert við

Um það atriði er snýr að flutningi lögheimilis til Rússlands vill Magnús koma eftirfarandi á framfæri:

„Ég hef lengi verið búsettur í útlöndum en af ákveðnum ástæðum hef ég ekki flutt lögheimili mitt þangað fyrr en nú. Þessi lögheimilisskipti koma þessu gjaldþrotamáli ekkert við. Ég vissi ekki um gjaldþrotaskiptabeiðni á hendur mér þegar ég flutti lögheimili mitt enda var fyrirkall héraðsdóms vegna beiðninnar ekki birt mér fyrr en nokkru eftir að ég hafði tilkynnt þjóðskrá um flutning á heimili mínu. Ég harma að þetta hafi verið túlkað sem flóttatilraun af minni hálfu. Ég hef haldið uppi málefnalegum og sanngjörnum vörnum í máli mínu og hvorki fyrr né nú áformað að hlaupa frá mínum skyldum."