Írakar ná flugvellinum í Mosul

Írakar hafa tekið flugvöll Mosul frá vígamönnum Íslamska ríkisins eftir um fjögurra tíma bardaga. Um er að ræða stóran lið í frelsun vesturhluta borgarinnar. Austurhluti Mosul var frelsaður í síðasta mánuði og aðgerðir í vestri hófust fyrr í vikunni. Mosul er næst stærsta borg Írak og hefur verið undir oki ISIS frá sumrinu 2014, þegar vígamenn gerðu skyndisókn á Írak og hertóku stóran hluta landsins.

Öryggissveitir Írak eru studdar af Bandaríkjunum og öðrum bandamönnum, en írakskir embættismenn sögðu AP fréttaveitunni að erlendir hermenn hefðu tekið þátt í aðgerðunum á og við flugvöllinn. Sveitirnar eru einnig sagðar standa í bardögum við ISIS-liða í nærliggjandi herstöð.

Vesturhluti borgarinnar er minni en austurhluti hennar, en hann er þéttbýlli og íbúar hans eru taldir vera hliðhollari ISIS en aðrir íbúar. Talið er að um 750 þúsund almennir borgarar haldi til í austurhluta Mosul. Þeir höfðu þó verið varaðir við aðgerðinni, en bæklingum var varpað yfir borgina þar sem íbúar voru varaðir við komandi bardögum.

Sameinuðu þjóðirnar sögðu frá því í janúar að um helmingur allra þeirra sem dóu í bardögum í austurhluta borgarinnar hafi verið almennir borgarar.

Vesturhluti borgarinnar er eldri en aðrir og götur þar eru þröngar. Talið er að þrengslin gætu gert öryggissveitunum erfitt fyrir og auðveldað ISIS-liðum að sitja fyrir þeim og notast við sprengjur og gildrur.

Vopnaðar sveitir sjálfboðaliða standa einnig í orrustum vestur af Mosul, þar sem þeir berjast gegn ISIS-liðum um fjölda þorpa.

Samkvæmt frétt BBC er flugbraut flugvallarins ónýt, en hann þykir þó mjög mikilvægur. Með því að stjórna flugvellinum geta Írakar tryggt aðkomuleiðir að borginni úr suðri.