Heimilt að láta rannsóknarfyrirtæki leita að týndum sjóðum

Skiptastjóra dánarbús Ingvars Helgasonar og Sigríðar Guðmundsdóttur er heimilt að veita bresku rannsóknarfyrirtæki umboð til þess að leita að týndum sjóðum sem kunna að vera í eigu dánarbúsins.

Héraðsdómur féllst á kröfu dánarbúsins en tveir af erfingjunum, Júlíus Vífill Ingvarsson og Guðmundur Ágúst Ingvarsson, lögðust gegn því að slík könnun yrði framkvæmd. Var málinu því skotið til Héraðsdóms Reykjavíkur.

Málið vakti mikla athygli fyrr á árinu þegar systkini Júlíusar Vífils, fyrrum borgarfulltrúa Sjálfstæðisflokksins, og Guðmundar Ágústs, fyrrverandi formanns Handknattleikssambands Íslands, komu fram í Kastljósi og báru þá bræður þungum sökum. Telja þau bræðurna hafa falið lífeyrissjóði foreldra þeirra í aflandsfélögum, ekki aðeins frá þeim systkinum heldur frá móður þeirra systkina. Bræðurnir hafna alfarið þessum ásökunum.

Líkt og Vísir greindi fá á síðasta ári ákvað skiptastjóri að dánarbúið skyldi fylgja á eftir könnun rannsóknarfyrirtækisins K2 Intelligence limited.

Ekki andvígir könnun en töldu hana of kostnaðarsama og tímafreka

Í dómi héraðsdóms kemur fram að kostnaður við slíka framhaldsrannsókn næmi 35 þúsund pundum, um 5,6 milljónir króna miðað við þáverandi gengi. Umboðsmaður Júlíusar Vífils og Guðmundar Ágústar lýsti þá andvíga að slík könnun væri fram á skiptafundum áður en málið fór fyrir dóm.

Fyrir dómi kröfðust Júlíus Vífill og Guðmundur Ágúst þess að ákvörðun skiptastjóra um að láta framkvæma slíka könnun yrði hnekkt. Þar kom fram að þeir lýstu sig ekki andvíga að könnunin væri fram. Töldu þeir þó að slík könnun yrði bæði tímafrek og kostnaðarsöm sem myndi tefja skiptalok.

Efuðust þeir um að sú upphæð sem nefnd var í tengslum við könnunina gæti staðist og töldu ljóst að kostnaðurinn yrði margfalt hærri. Bentu þeir á að í samningsdrögum við K2 sem kynnt voru á slitafundi kæmi fram að sá kostnaður sem nefndur var væri aðeins upphafsgreiðsla vegna fyrsta áfanga rannsóknarinnar. Einsýnt væri að kostnaðurinn yrði mun hærri þegar uppi væri staðið.

Þá töldu þeir eðlilegt að þeir erfingjar sem vildu láta framkvæma könnunina myndi sjálfir greiða fyrir slíka könnun enda hefðu þeir lýst sig reiðubúna til þess og var vitnað í frétt á vef Fréttatímans því til stuðnings.

Dómari við Héraðsdóm Reykjavíkur úrskurðaði að skiptastjóri mætti hefja könnunina. Í dóminum kemur fram að málsmeðferð skiptastjóra hafi verið í samræmi við lög og vísaði til þess að könnunin hefði verið samþykkt á skiptafundi.

Dóm héraðsdóms má sjá hér.