Borgnesingar í toppsætið eftir sigur á Keflavík | Snæfell nálgast toppinn

Skallagrímskonur halda sigurgöngunni áfram en þær unnu nauman 71-69 sigur á Keflavík á heimavelli í dag en með sigrinum náðu þær toppsætinu af Keflvíkingum.

Eftir þrettán stiga tap í Keflavík þann 3. desember síðastliðinn höfðu Skallagrímskonur svarað með sex sigurleikjum í röð fyrir leik dagsins en Keflavíkurliðið var aðeins farið að hiksta með tvo tapleiki í síðustu fjórum.

Það er óhætt að segja að leikur dagsins hafi verið kaflaskiptur en gestirnir úr Keflavík spiluðu góða vörn og leiddu með níu stigum eftir fyrsta leikhluta 22-13 en hlutirnir snerust við í öðrum leikhluta.

Borgnesingar settu í fluggír í sóknarleiknum og tóku átta stiga forskoti inn í hálfleikinn 44-36. Keflavík náði að minnka bilið í fjögur stig fyrir lokaleikhlutann og náðu að jafna metin í lokaleikhlutanum en taugar Skallagrímsliðsins reyndust vera sterkari á lokamínútunum.

Tavelyn Tillman var stigahæst í liði Skallanna með 25 stig en Sigrún Sjöfn Ámundadóttir bætti við sautján stigum en í liði Keflavíkur var Ariana Moorer atkvæðamest með 19 stig ásamt því að taka 13 fráköst og gefa sex stoðsendingar.

Í seinni leik dagsins mættust liðin sem léku oddaleik upp á Íslandsmeistaratitilinn síðasta vor en miklar breytingar hafa orðið á liðunum frá því.

Snæfell sem hefur titil að verja var í þriðja sæti deldarinnar fyrir leikinn og gat með sigri saxað á annað hvort toppliðið en Haukakonur gátu komist upp að hlið Valsliðsins í 6. sæti.

Snæfellskonur byrjuðu betur og leiddu 34-27 í hálfleik en þær unnu alla fjóra leikhlutana á heimavelli og unnu að lokum sannfærandi 24 stiga sigur 73-49.

Aaryn Ellenberg-Wiley var stigahæst í liði Snæfells með 26 stig ásamt því að taka 8 fráköst og gefa sex stoðsendingar en í liði gestanna var það Nashika Wiliams sem var atkvæðamest með 21 stig og 18 fráköst.