Stefna forstjóra vegna sölu á Borgun

Landsbankinn hefur stefnt Borgun hf., Hauki Oddssyni, forstjóra Borgunar, BPS ehf. og Eignarhaldsfélaginu Borgun slf. Tveir síðastnefndu aðilarnir eru hluthafar í Borgun.

Málið tengist sölu á 31,2 prósenta hlut Landsbankans í Borgun í nóvember 2014.

Í tilkynningu frá bankanum segir að málið sé höfðað til viðurkenningar á skaðabótaskyldu stefndu. Bankinn telji sig hafa orðið af söluhagnaði við sölu á hlut sínum í Borgun.

„Bankinn fékk ekki upplýsingar sem stefndu bjuggu yfir um að Borgun hf. ætti hlut í Visa Europe Ltd. og réttindi sem fylgdu hlutnum, þ. á m. mögulega hlutdeild í söluhagnaði Visa Europe Ltd. við nýtingu söluréttar í valréttarsamningi Visa Inc. og Visa Europe Ltd.“

Bæði Landsbankinn og Borgun höfnuðu ósk Fréttablaðsins um afrit af stefnunni. 

Fréttin birtist fyrst í Fréttablaðinu