Desemberspá Siggu Kling - Tvíburinn: Það er mikil rómantík í loftinu

Elsku tvíburinn minn. Það er nú búið að vera meira fjörið hjá þér, það er alltaf eitthvað að gerast. Ef þú skoðar vel þetta ár, þá hafa orðið miklar breytingar á mörgu, þú sigraðir svo margt í kringum þig að þú getur verið þakklátur. Það er ýmislegt sem þú átt eftir að leiðrétta og klára og þú gerir það núna, svo einfalt er það.

Þegar þeim kafla er lokið átt þú eftir að elska desember, rómantíkina, ljósið og fjörið. Fólkið í kringum þig mun líta upp til þín og finnast þú svo ótrúlega hugrakkur, en það eru ekki allir sem munu segja þér frá því hvað þeim finnst þú vera mikil fyrirmynd annarra. En það skiptir engu máli því að þú ert á réttri braut.

Desember er alveg þinn mánuður, það er á hreinu. Það er mikil rómantík í loftinu og ef þú ert ástþyrstur, hjartað mitt, þá getur þú fengið eins mikið að drekka og þú vilt. Þetta er töfrandi tímabil fyrir þig, það verður mikið af veislum og gleði, jólastressið verður þér til gleði og þú átt eftir að hafa gaman af því að skauta í gegnum þennan mánuð.

Þú virðist hitta manneskju eða hóp af fólki sem hefur mikil áhrif á þig. Þú ert með mjög opið hjarta núna til að taka inn nýjar skoðanir, bæta inn nýjum vinum og finna að þú þorir og virkilega getir. Það væri alveg dásamlegt að þú skrifaðir niður lítinn „bucket“-lista um hvað þig langar að framkvæma eða hvað þú vilt að gerist hjá þér næstu sex mánuði.

Lífsorka þín er svo mótandi núna að óvenjulegustu óskir geta ræst, þú þarft að vera handviss um að þú viljir það sem þú skrifar niður, þú átt eftir að vera undrandi hvað mikið af þessu mun birtast þér. Ég er rísandandi tvíburi, og er mjög spennt fyrir þessum mánuði sem er að koma, ég myndi jafnvel vilja vera í tvíburamerkinu núna, því hamingjan og gleðin á heima þar.

Skilaboðin til þín fyrir desember: Ef þú værir hús myndu allir vilja búa í því .

Frægir Tvíburar: Ragnar Sigurðsson landsliðsmaður, Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson, bæjarstjóri Garðabæjar, Andri Freyr útvarpsmaður og Lýðveldið Ísland, Donald Trump, Þórarinn Þórarinsson blaðamaður.