Treyja Duncans verður hengd upp í rjáfur

San Antonio Spurs mun heiðra Tim Duncan með því að hengja treyju hans, númer 21, upp í rjáfur í AT&T Center.

Treyja Duncans verður hengd upp í rjáfur við hátíðlega athöfn eftir leik San Antonio og New Orleans Pelicans 18. desember næstkomandi. Félagið tilkynnti þetta í dag.

Duncan lagði skóna á hilluna í sumar eftir 19 tímabil hjá San Antonio. Á þeim tíma vann liðið aldrei færri en 50 leiki, nema verkfallstímabilið 1998-99 þegar San Antonio vann 37 af 50 leikjum sínum.

Á nítján ára ferli Duncans hjá San Antonio komst liðið sex sinnum í lokaúrslit og varð fimm sinnum NBA-meistari.

Duncan, sem er af flestum talinn besti kraftframherji sem hefur spilað í NBA, var tvisvar sinnum valinn verðmætasti leikmaður deildarinnar og þrisvar sinnum verðmætasti leikmaður lokaúrslitanna.

Duncan verður áttundi leikmaðurinn í sögu San Antonio sem fær treyjuna sína hengda upp í rjáfur. Hinir eru Bruce Bowen, Johnny Moore, Avery Johnson, James Silas, Sean Elliott, George Gervin og David Robinson.

Tim Duncan to the rafters!

We will retire No. 21 on December 18th in a special postgame ceremony » https://t.co/ysH8Epa5Hm pic.twitter.com/EPF8V8Cvj0

— San Antonio Spurs (@spurs) November 16, 2016