Guðni segir Sigmund geta skaðað Framsóknarflokkinn

Guðni Ágústsson, fyrrum formaður Framsóknarflokksins, segir engan einn mann stærri en flokkurinn. Hann segir mikilvægt að fá frið um formannsembætti flokksins og að í starfið þurfi að veljast maður sem geti talað við alla án þess að persónuleg einkamál þvælist fyrir góðum málum ríkisstjórnarinnar.

„Framsókn vill geta lagt verk sín í dóm kjósenda. Nú finn ég að þó mönnum þyki vænt um Sigmund Davíð óttast menn að þessi vondu mál sem hann hefur orðið fyrir muni yfirskyggja alla kosningabaráttu og skaða árangur flokksins í kosningunum,“ segir Guðni.

Guðni hefur verið einn áhrifamesti maður Framsóknarflokksins síðustu þrjátíu og fimm ár. Hann settist fyrst inn á þing fyrir flokkinn árið 1986 sem varaþingmaður og sat á þingi til ársins 2008 þegar hann lét af störfum sem formaður flokksins og „lagði hann í hendur grasrótarinnar,“ eins og Guðni orðar það.

Nú, átta árum, tveimur kosningum og einum sigri síðar, er flokkurinn á tímamótum. Sigmundur Davíð Gunnlaugsson hefur þurft að svara fyrir aflandseigur sínar þar sem hann leyndi því fyrir kjósendum að hann ætti háar fjárhæðir í aflandsfélagi í alræmdu skattaskjóli og hafi selt hlut sinn í félaginu konu sinni á einn dal degi áður en harðari reglur um hagsmunaskráningu þingmanna tóku gildi.

Kalt á toppnum

Guðni bendir á að traust stjórnmálamanna skipti miklu máli. Almenningur verði að geta treyst orðum þingmanna og ráðherra. Traust Sigmundar gagnvart almenningi hafi beðið hnekki. „Tindur stjórnmálamannsins er kaldur og pólitíkin er ekki alltaf sanngjörn. Það er engin spurning í mínum huga að Sigmundur Davíð Gunnlaugsson varð fyrir miklu áfalli hvað traust varðar, vegna peninga í Panamaskjölum og föllnum bönkum.“

„Hann hafði ekki brotið lög en á einu augabragði risu um hann miklar deilur sem bæði hafa verið í þjóðfélaginu sem og innan raða Framsóknarflokksins sem sést nú best í hans kjördæmi þegar allir þingmenn hjóla í fyrsta sætið. Hið góða var að ríkisstjórnin hélt áfram undir stjórn Sigurðar Inga Jóhannssonar og hann tók við hinu fallna merki þegar Sigmundur þurfti að víkja af velli.“

Sigurður getur talað við alla

Guðni telur að það hafi verið farsælt að Sigurður Ingi hafi tekið að sér forsæti í ríkisstjórn eftir fall Sigmundar Davíðs í byrjun apríl á þessu ári. Að hans mati var það farsælt fyrir íslenska þjóð að í starfið kæmi maður sem gæti róað þingið og haldið starfinu áfram.   

„Sigurður Ingi tók við forsætisráðherrastarfinu við mjög erfiðar aðstæður en hefur staðið sig frábærlega Hann sættir öfl, hann friðar þing og róar það niður, hann hefur verið auðmjúkur og talað við alla þannig að hann gerir þetta eins og best verður gert,“ segir Guðni.

Tveir hjartakóngar

Haustfundur miðstjórnar Framsóknarflokksins sem haldinn var um helgina í Hofi á Akureyri staðfesti að tvær fylkingar eru farnar að berjast innan flokksins. Forsætisráðherra var ekki settur á dagskrá fundarins heldur hélt Sigmundur Davíð langa tölu, opna fjölmiðlum, um afrek flokksins undir hans stjórn. Þetta gramdist forsætisráðherra og sagðist ekki geta setið í óbreyttri stjórn að afloknu flokksþingi.

„Það eru tveir hjartakóngar í spilum Framsóknarflokksins,“ segir Guðni. „Sigmundur Davíð er afreksmaður í pólitík. Með skuldalækkun, Icesave og að endurheimta fé fallinna banka hefur hann sýnt það. Nú eiga Framsóknarmenn ekki að deila um þessa menn. Þeir verða að meta þetta eins og í fótbolta. Á Eiður Smári að vera sá sem keyrir liðið áfram og skorar mörkin eða er annar líklegur til þess að gera það betur í þetta sinn,“ segir Guðni.

Guðni vill ekki sjálfur fella dóma en segir frið um Sigurð á meðan spjót standa að Sigmundi Davíð.

Þarf sterkan leiðtoga

Í kosningabaráttunni árið 2013 vann Framsóknarflokkurinn, undir formennsku Sigmundar Davíðs Gunnlaugssonar, stórsigur. Þrátt fyrir að hafa fengið næstflest atkvæði ákvað þáverandi forseti og stórvinur Guðna, Ólafur Ragnar Grímsson, að veita Sigmundi Davíð Gunnlaugssyni umboð til stjórnarmyndunar.

Nú sé hinsvegar uppi aðrir tímar og vert sé að skoða málin upp á nýtt. „Nú þarf sterkan leiðtoga til að leiða flokkinn áfram. Sigmundi heppnaðist að ná fjórðungsfylgi en þessir peningar þeirra hjóna þvældust fyrir honum og auðvitað hefðu átt að vera geymdir annars staðar,“ segir Guðni „Það er enginn stærri en flokkurinn. Hér talar maður sem fórnaði starfi sínu fyrir flokkinn. Þegar framsóknarflokkurinn fékk sína verstu útreið 2007 sagði Jón Sigurðsson af sér og ég tók við. Þá vonaði ég eftir því að geta friðað flokkinn en tókst ekki. Því var ekkert í stöðunni annað en að segja af mér og afhenda grasrótinni flokkinn.“

Þurfum formann sem getur talað við alla

Framsóknarflokkurinn verður senn eitt hundrað ára. Samkvæmt núverandi formanni flokksins hefur hann verið umbótaafl í íslenskum stjórnmálum í heila öld og afl breytinga til batnaðar. Flokkurinn hefur gengið í gegnum ýmsar raunir og telur Guðni sjá það sama gerast nú og gerðist á tímum Jónasar frá Hriflu.

„Mér er auðvitað harmur í huga þetta ólán sem Sigmundur Davíð lenti í. Það var auðvitað einkamál þeirra hjóna sem gerðu það að verkum. Þetta hefur valdið miklum deilum og minnir um margt á sögu Framsóknarflokksins. Jónas frá Hriflu og Hermann Jónasson tókust á og var Jónas að lokum felldur fyrir rest. Þessi mesti maður íslenskra stjórnmála sem lagði til stærstu afrek íslenskrar þjóðar í áratugi laut þar í gras.“

Ekki verður annað ráðið af orðum Guðna annað en að hann líki Sigmundi við Jónas. Næstu vikur munu síðan skera úr um það hvort sagan endurtaki sig að fullu í Framsóknarflokknum.

Guðni segir hinsvegar það skipa mestu máli að fá óumdeildan formann og að menn sammælist um einn mann sem fari  fyrir flokki Framsóknarmanna með málefnin inn í næstu kosningar.

„Nú þurfa vitrir menn í Framsókn að setjast niður, íhuga þetta mál því við þurfum að hafa frið í pólitíkinni í stað innanflokksátaka. Við þurfum formann sem getur talað við alla án þess að verið sé að ræða einhver einkamál sem þvælast kunnu fyrir. við þurfum Óumdeildan formann sem samstaða næst um,“ segir Guðni. Það sé hinsvegar flokksmanna að velja hver sé best til þess fallinn að leiða flokkinn.

„Ef Sigmundur Davíð nær því getur hann leitt flokkinn áfram en ef ekki þarf að setja nýjan mann inn á völlinn. Sigurður Ingi hefur sýnt að hann er góður skipstjóri og sem forsætisráðherra hefur hann af myndarskap farið fyrir ríkisstjórn.“

Örlagastund upp runnin

Eftir fall fjármálakerfisins árið 2008 hefur íslenskt þjóðfélag tekið stakkaskiptum. Síðustu ár hafa verið hagfelld fyrir okkur og árangurinn af uppbyggingu eftir hrunið hefur verið mjög hraður. Núverandi stjórnvöld hafa setið í brúnni síðustu þrjú og hálft ár og vilja ólm komast í kosningabaráttu þar sem aðeins verk ríkisstjórnarinnar eru lögð í dóm kjósenda. Guðni telur það gríðarlega mikilvægt að kjósendur sjái á hve góðum stað við erum sem þjóð eftir ríkisstjórnartíð undir forsæti Framsóknarflokksins er.

„Við lifum í bestu stöðu Íslands frá heimsstyrjöld. Hér er engin verðbólga, full atvinna og glæst tækifæri framundan. Því megum við ekki lenda í pólitískum vandræðum nú og menn verða að hugsa pólitískt inni í Framsóknarflokknum.“

Hann segir einnig að flokkurinn þurfi aðeins að gera upp á milli þess hvort það vilji stríð eða frið. „Mér sýnist örlagastund upp runna hjá Sigmundi Davíð. Spjót standa að honum og flokknum en það er friður um Sigurð Inga. Þannig að hann hefur styrkt sig mjög og hann hlýtur að velta ýmsu fyrir sér sem og að  flokkurinn hugsi hvort menn vilji að að hann taki við forystunni.“