Reykjavík orðin dýrust miðað við aðrar höfuðborgir

Reykjavík er dýrasta höfuðborg í Evrópu sé litið til meðalverðs á stórum innlendum bjór, þriggja rétta máltíð, nætur á þriggja stjörnu hóteli og leigubílaferðar. Þetta kemur fram í nýrri skýrslu efnahagssviðs Samtaka atvinnulífsins, Komið þið fagnandi. Ferðaþjónusta á Íslandi: Uppgangur og áskoranir, sem var kynnt á opnum umræðufundi Samtaka atvinnulífsins í gær.

Gengisstyrking krónunnar hefur leitt til hærra verðlags í ferðaþjónustu, og svo gæti farið að með áframhaldandi styrkingu krónunnar verði Ísland of dýr áfangastaður.

„Það eru vísbendingar um að við séum í dýrari kantinum miðað við aðrar höfuðborgir. Í kjölfar efnahagshrunsins vorum við hlutfallslega mjög ódýr vegna veikingar krónunnar í evrum talið, en verðlagið hefur verið stígandi upp á við undanfarin árin. Bæði vegna aukinnar verðbólgu en einkum og sér í lagi vegna gengisstyrkingar krónunnar,“ segir Ásdís Kristjánsdóttir, forstöðumaður efnahagssviðs Samtaka atvinnulífsins.

„Það sem er sláandi er að við sjáum verulegar verðhækkanir á liðum tengdum ferðaþjónustu, eins og hótelum og veitingastöðum. Nokkrir þættir hafa þar áhrif. Í fyrsta lagi er ferðaþjónustan verulega útsett fyrir miklum launahækkunum enda vinnuaflsfrek grein, í öðru lagi hefur gengisstyrking krónunnar þau áhrif að við verðum dýrari í erlendum gjaldmiðlum. Í þriðja lagi þá hefur verið framboðsskortur einkum og sér í lagi á höfuðborgarsvæðinu sem hefur sitt að segja. Við sjáum að hótel og veitingastaðir eru dýrari í evrum en til að mynda fyrir 2008 og hlutfallslega dýrari í samanburði við evrusvæðið eða Noreg.“ 

Fram kemur í greiningunni að samkvæmt könnun Travelsat var fjórða algengasta ástæða sem ferðamenn tilgreindu fyrir að velja áfangastað að þeir hefðu fengið gott tilboð eða töldu áfangastaðinn ódýran. Því getur verðlag haft veruleg áhrif á val á áfangastað. Að mati Ásdísar gæti komið til þess að Ísland verði of dýr áfangastaður og það dragi úr fjölgun ferðamanna.

„Áframhaldandi styrking á krónunni mun grafa undan samkeppnisstöðu greinarinnar og við verðum ennþá dýrari. Mikilvægt er að gæði og þjónusta standi undir slíkri verðlagningu, að öðrum kosti verður upplifun ferðamanna einfaldlega neikvæð.“

Að mati Ásdísar þarf að horfa á heildarmyndina, og tryggja samkeppnisstöðu ferðaþjónustunnar og annarra útflutningsgreina. „Ferðaþjónustan hefur verið í örum vexti og allt útlit fyrir að slíkur vöxtur verði áfram, a.m.k. í bili. Áframhaldandi styrking nafngengis, verulegar launahækkanir og hátt vaxtastig grefur hins vegar undan greininni. Horft fram á veginn þarf að vera skýrari stefna um framtíð ferðaþjónustunnar og tryggja að ferðaþjónustan geti starfað í heilbrigðu og stöðugu rekstrarumhverfi,“ segir Ásdís. 

Efnahagssviðið leggur til að launahækkanir taki mið af svigrúmi útflutningsgreina eins og ferðaþjónustunnar. Að skýr stefna verði um hvernig stjórnvöld ætli að tryggja sjálfbærni greinarinnar til langs tíma og hámarka arðinn af þessari nýju atvinnugrein. 

Þessi frétt birtist fyrst í Fréttablaðinu.