Öllum prófkjörum Pírata lokið

Þórður Guðsteinn Pétursson, íþróttafræðingur, mun leiða lista Pírata í Norðvesturkjördæmi. Þórður hlaut mestan stuðning í prófkjöri flokksins í kjördæminu en því lauk í gær. Sautján voru í framboði og greiddu 95 atkvæði í prófkjörinu.

Gunnar Jökull Karlsson, verkamaður, Eiríkur Þór Theódórsson, sýningarstjóri Landnámsseturs Íslands, og Eva Pandora Baldursdóttir, nemi í opinberri stjórnsýslu, skipa næstu þrjú sæti á listanum. Eiríkur lenti í þriðja sæti í prófkjörinu en verður í fjórða sæti listans.

Þar með liggur ljóst fyrir, með þeim fyrirvara að allir muni taka sæti á lista og að framboðslistarnir verði samþykktir af kjördæmisráðum, hverjir munu skipa lista Pírata í Alþingiskosningunum 29. október næstkomandi. Prófkjör flokksins í kjördæminu var hið síðasta á landsvísu. Píratar eru því fyrstir allra til að hafa á hreinu hverjir það verða sem bjóða sig fram í haust.

Alls greiddu 1.318 atkvæði í prófkjörunum, þar af 1.034 í sameiginlegu prófkjöri fyrir kjördæmin þrjú á höfuðborgarsvæðinu, en frambjóðendur voru 161.

Efstu fjögur sætin í hverju kjördæmi fyrir sig má sjá hér fyrir neðan.

Norðvesturkjördæmi:

1. Þórður Guðsteinn Pétursson, íþróttafræðingur

2. Gunnar Jökull Karlsson, verkamaður

3. Eva Pandora Baldursdóttir, viðskiptafræðingur

4. Eiríkur Þór Theódórsson, sýningarstjóri

Norðausturkjördæmi:

1. Einar Aðalsteinn Brynjólfsson, menntaskólakennari

2. Guðrún Ágústa Þórdísardóttir, rekstrarfræðingur

3. Hans Jónsson, öryrki

4. Gunnar Ómarsson, rafvirki

Suðurkjördæmi:

1. Smári McCarthy, tæknistjóri

2. Oktavía Hrund Jónsdóttir, ráðgjafi

3. Þórólfur Júlían Dagsson, sjómaður

4. Álfheiður Eymarsdóttir, stjórnmálafræðingur

Suðvesturkjördæmi:

1. Jón Þór Ólafsson, útlagningarmaður og fyrrverandi þingmaður

2. Þórhildur Sunna Ævarsdóttir, lögfræðingur

3. Andri Þór Sturluson, eigandi Sannleikurinn.com

4. Sara E. Þórðardóttir Oskarsson, formaður Jæja-hópsins

Reykjavíkurkjördæmi norður:

1. Birgitta Jónsdóttir, þingmaður

2. Björn Leví Gunnarsson, hugbúnaðarsérfæðingur

3. Halldóra Mogensen, varaþingmaður

4. Katla Hólms Vilbergs- og Þórhildardóttir, heimspekingur

Reykjavíkurkjördæmi suður:

1. Ásta Helgadóttir, þingmaður

2. Gunnar Hrafn Jónsson, fréttamaður

3. Viktor Orri Valgarðsson, stjórnmálafræðingur

4. Olga Cilia, bókmennta- og lögfræðingur