Hefur staðið á bryggjunni á Heimaey með brotaþolum sem upplifa svakalega skömm

„Ég held að þetta sé skref í rétta átt,“ segir Hjalti Jónsson, formaður áfallateymis á Þjóðhátíð í Vestmannaeyjum, um þá ákvörðun Páleyjar Borgþórsdóttur, lögreglustjóra í Vestmannaeyjum, að gefa ekki upp fjölda tilkynntra kynferðisbrota til fjölmiðla daginn eftir. Ákvörðunin er umdeild en upplýst var um hana fyrir Verslunarmannahelgina í fyrra og er enn til umræðu.

Hjalti ræddi málin í Bítinu í morgun og lýsti því hvernig áfallateymið starfaði. Klukkan tólf á hádegi hittist hópurinn á samráðsfundi. Á þeim tímapunkti séu sjaldnast öll kurl komin til grafar.

Spyr sig hver ástæðan sé að birta upplýsingar

„Hver er ástæðan til að birta allar upplýsingar þegar við erum ekki með allar upplýsingar?“ spyr Hjalti. „Jafnvel að tala um brot sem síðar er dregið til baka? Eða brot þar sem brotaþoli er í miklu tilfinningalegu uppnámi?“

Hjalti hefur starfað með áfallateyminu í mörg ár. Hann segir að Vestmannaeyjar séu lítið bæjarfélag og minnir á að Ísland sé lítið land.

„Ég sést keyra einstakling upp á flugvöll eða niður í skip. Í fréttum er talað um nauðgun í Vestmannaeyjum. Fólk fer strax að leggja saman tvo og tvo,“ segir Hjalti sem hefur lent í erfiðum aðstæðum.

„Ég hef lent í þessum aðstæðum þar sem brotaþolar hafa átt mjög erfitt með að horfa framan í fólk niðri við bryggju, spurt mig mikið út í það, hvað ætli þetta fólk sé að hugsa um núna? Skömmin er svo svakalega mikil.“

Telur umræðuna á lágu plani

Ákvörðun Páleyjar hefur verið sögð þöggunartilburðir. Hjalti telur þá umræðu á lágu plani.

„Það sem kom mér á óvart er þessi tengsl við þöggun. Mér finnst sú umræða á mjög lágu plani. Það er verið að blanda saman hugtökum sem eiga ekki samleið. Það er ekki verið að tala um þöggun þótt þú sért að bíða með upplýsingar. Þöggun er ef þú veitir engar upplýsingar​.“

Spurður hvort ástæða er til að hafa áhyggjur af gestum sagði Hjalti að sjálfsögðu ekki. Hann sagði fólk ekki þurfa að hafa meiri áhyggjur af fólki sem fer á þjóðhátíð í Eyjum en öðrum hátíðum á Íslandi og víðar um heim. „Ég hef ekki séð tölur sem sýna að brot séu fleiri þar en annar staðar og þegar kemur að viðbragðinu þá þori ég að fullyrða að viðbragðið í Eyjum er með betra lagi þegar kemur að þessum málaflokki. Ég þekki það ekki af öðrum hátíðum á Íslandi en hef kynnt mér það hér í Danmörku og það kom mér á óvart hversu lítið viðbragð er hér úti.“

Hægt er að hlusta á viðtalið við Hjalta í heild sinni í spilaranum hér fyrir ofan.