Van Gaal kemur til greina sem næsti þjálfari belgíska landsliðsins

Framkvæmdarstjóri belgíska knattspyrnusambandsins, Francois De Keersemacker, segir að Louis Van Gaal komi til greina sem næsti þjálfari belgíska landsliðsins eftir að samningi Marc Wilmots var sagt upp í gær.

Van Gaal er atvinnulaus þessa dagana eftir að samningi hans hjá Manchester United var sagt upp í vor en undir hans stjórn vann hollenska liðið bronsverðlaun á HM 2014.

De Keersemacker sagðist eiga von á því að heyra í ansi mörgum sem hefðu áhuga á starfinu og að hann myndi ekki útiloka neinn, meðal annars Van Gaal.

„Hann er einn af þeim sem kemur til greina, við þurfum að sjá til hvort hann hafi áhuga á starfinu. Ef hann sækir um munum við skoða hann vandlega, við viljum fá þjálfara sem hefur unnið til verðlauna á alþjóðavettvangi.“

Undir stjórn Wilmots fór belgíska liðið á topp heimslistans en liðið féll úr leik í 8-liða úrslitunum á HM og EM sem þótti ekki fullnægjandi.