Westbrook hló að spurningu um Stephen Curry

Stephen Curry, besti leikmaður NBA-deildarinnar, fékk ekki mikla virðingu frá Russell Westbrook á blaðamannafundi eftir að Golden State Warriors liðið vann fimmta leikinn á móti Oklahoma City Thunder og hélt lífi í tímabilinu sínu.

Russell Westbrook og félagar í Oklahoma City Thunder þurfa áfram bara einn sigur í viðbót til að slá út NBA-meistarana og tryggja sér sæti í úrslitaeinvíginu um NBA-titilinn.

Kevin Durant og Russell Westbrook mættu saman á blaðamannafundinn og það var Durant sem svaraði þegar þeir voru spurðir um það hvort Stephen Curry væri vanmetinn varnarmaður.

Á meðan Kevin Durant fór fínt í það að gera lítið úr varnarhæfileikum Stephen Curry þá gat Russell Westbrook ekki stillt sig og hló að spurningunni.  ESPN segir frá.

Stephen Curry hefur verið að dekka mikið Russell Westbrook í einvíginu og það hefur verið mjög krefjandi enda Westbrook með 28,0 stig og 11,0 stoðsendingar að meðaltali í þessum fimm leikjum.

Bandarískir körfuboltatölfræðingar voru þó búnir að taka það saman að Westbrook hefur aðeins nýtt 32 prósent skota sinna (8 af 25) þegar Curry er að dekka hann en sú prósenta fer upp í 44 prósent (37 af 84) þegar aðrir eru að dekka hann. Westbrook hefur líka tapað 7 boltum með Curry að trufla sig.

„Hann er þokkalegur varnarmaður en hann er samt ekki að dekka bestu leikstjórnendurna," svaraði Kevin Durant og bætti við: „Þeir gera góða hluti með því að láta nokkra menn dekka Russell, allt frá [Klay] Thompson til [Andre] Iguodala. Steph fær stundum að reyna sig á móti honum. Hann hreyfir fæturna ágætlega og er góður með höndunum," sagði Kevin Durant.

Stephen Curry stal flestum boltum í NBA-deildinni í vetur en hann viðurkenndi það sjálfur aðspurður um ummæli Kevin Durant að Klay Thompson fengi oftar meira krefjandi verkefni í vörninni.

„Ég er með frábæra liðsfélaga sem eru betri að dekka menn út á velli. Ég fagna samt áskoruninni þegar ég fæ tækifæri til að dekka mann eins og Russell. Ég reyni að gera mitt besta og er alltaf að reyna að verða betri varnarmaður," sagði Curry.

Sjötti leikur Oklahoma City Thunder og Golden State Warriors er annað kvöld og hefst klukkan eitt eftir miðnætti. Hann fer fram á heimavelli Oklahoma City Thunder þar sem Russell Westbrook og félagar í Thunder unnu tvo örugga sigri í fyrri leikjum sínum þar í þessu einvígi.