Sprengdi netþjóninn við fyrstu útgáfu

Aron Can er 16 ára rappari úr Reykjavík sem náði þeim merka áfanga að sprengja netþjón sinn á sunnudag þegar hann gaf út sitt fyrsta „mixteip“ sem er ný yrði yfir þröngskífur sem aðeins eru gefnar út á netinu.

„Það voru 500 manns sem reyndu að sækja plötuna á sama tíma á sunnudag sem olli því að hún datt niður í smá tíma,“ segir Aron en mixteipið er frítt til niðurhals á aroncan.com. „Í dag eru rúmlega 2000 manns búnir að sækja hana. Þetta er frábært.“

Nennir ekki að auglýsa sjálfan sig

Á sama tíma hefur myndband sem rapparinn deildi á sama degi, nokkrum klukkustundum á undan útgáfunni, við lögin „Enginn mórall/Grunaður“ fengið yfir 17 þúsund spilanir. Myndbandið má sjá hér að ofan.

Rapparinn auglýsti aðeins um útgáfuna á twitter-síðu sinni en ákvað að tilkynna ekki um útgáfuna sjálfur á Facebook. Í ljósi þess hljóta þessar tölur því að vera nokkuð „swag“alegar.

„Ég reyni bara að láta þetta fattast. Ég nenni ekki að vera auglýsa sjálfan mig út um allt. Við völdum nokkra sem okkur fannst vera mikilvægir og létum þá hafa plötuna fyrst. Þeir gátu svo bara pósta ef þeir vildu. Ég twittaði samdægurs að platan kæmi út þann dag og einhverjir hafa greinilega verið að fylgjast með. Viðbrögðin eru geðveik og er gott pepp fyrir mig. Það hjálpaði eflaust að ég henti út vídjóinu nokkrum klukkustundum áður. Það var því mjög mikið bözz í gangi.“

Útgáfa með nýjum hætti

Aron Can hefur áður gefið út lagið Þekkir stráginn sem er komið með um 17 þúsund spilanir á YouTube. Lagið má heyra hér að neðan.

„Ég dánlóda plötum. Svo þegar ég er í partý fer ég á YouTube. Spotify er númer eitt í dag, það nota það allir. Það er bara hægt að dánlóda plötunni minni á síðunni eins og er. Ég vil bara að fólk eigi plötuna inn á tölvunum sínum fyrst. Svo fer hún á YouTube, Spotify og Soundcloud á sama degi.“

Það má greina smá áhrif frá The Weeknd, bæði í taktík og tónum því sá tónlistarmaðurinn hóf sinn feril á því að gefa út þrjú mixteip sama árið. Þúsundir manna höfðu sótt mixteipin frítt áður en þau voru síðar gefin út á plötum.

„Við erum að reyna gera þetta á nýjan hátt. Það eru ekki margir sem gefa út vídjó og plötu sama dag. Við erum bara að reyna fara eitthvað nýtt með þetta. Á meðan þetta er svona ógeðslega heitt þá er ég strax byrjaður að taka upp ný lög. Ég veit ekkert hvenær það kemur út en fólk verður bara að fylgjast með.“

Tónleikar verða sjaldgæfir

Það er nóg að gera hjá Aron Can næstu vikurnar en á morgun kemur hann fram á Húrra ásamt SXSXSX og Hr. Hnetusmjör.

„Það er geðveikt mikið af tónleikum fram undan. Mig langar að tónleikar með mér verði sjaldgæfir. Mig langar ekki að birtast á öllum tónleikum. Mér finnst frábært að fólk viti hver ég er en ég vil ekki að fólk sé alltaf að horfa á mig spila. Ég er enn að komast upp, ég er ekki alveg mættur. Þegar það gerist ætla ég að reyna hafa þetta þannig að ég verði bara á stærri sjófunum. Ég ætla ekki mikið að vera spila á bjórkvöldum og svoleiðis. Ég er sjálfur kominn með leiður á mörgum röppurum, því það er alltaf sama sjittið á svoleiðis.“