Spurs sló eitt met Bulls og Warriors nálgast enn stóra met Bulls

Golden State vann Utah Jazz, 103-96, eftir framlengingu þegar liðin mættust í NBA-deildinni í körfubolta í nótt en eins og svo oft áður var það Stephen Curry sem var stjarna sýningarnnar.

Þegar Golden State var undir í fjórða leikhluta fór hann fyrir endurkomunni og skoraði svo sex stig í röð í framlengingunni sem gestirnir unnu með sjö stigum, 14-7.

Curry skoraði í heildina 31 stig í nótt, tók sjö fráköst og gaf fjórar stoðsendingar en hann hitti úr fimm af tíu þriggja stiga skotum sínum. Klay Thompson var með 18 stig en hann hitti úr þremur af átta fyrir utan línuna.

Meistararnir eru nú búnir að vinna 68 leiki og þurfa fimm sigra í síðustu sjö leikjum sínum til að bæta met besta NBA-liðs frá upphafi; Chicago Bulls frá 1995/1996. Það lið vann 72 leiki og tapaði 10 í deildarkeppninni áður en það varð svo meistari.

Það sama Chicago-lið átti metið yfir flesta heimasigra í röð í deildarkeppninni þar til í nótt eða 37 í röð. San Antonio Spurs gerði betur og vann 38. heimaleikinn í röð í nótt þegar liðið lagði New Orleans Pelicans, 100-92.

Argentínski ofurmaðurinn Manu Ginobili kom sterkur inn af bekknum og var stigahæstur allra á vellinum með 20 stig á 24 mínútum. Hann hitti úr fimm af sex þriggja stiga skotum sínum. Kawhi Leonard (16 stig, 6 fráköst, 4 stoðs.) og Danny Green (16 stig, 4 fráköst) voru bestir byrjunarliðsmanna í enn einu liðsframtaki San Antonio.

Í spilaranum hér að ofan má sjá eina laglega troðslu frá LaMarus Aldridge fyrir Spurs í nótt.

Úrslit næturinnar:

Toronto Raptors - Atlanta Hawks 105-97

Memphis Grizzliez - Denver Nuggets 105-109

Milwaukee Bucks - Phoenix Suns 105-94

Minnesota Timberwolves - LA Clippers 79-99

Dallas Mavericks - NY Knicks 91-89

San Antonio Spurs - New Orleans Pelicans 100-92

Utah Jazz - Golden State Warriors 96-103

Sacramento Kings - Washington Wizards 120-111

LA Lakers - Miami Heat 102-100