Kobe setti sjö þrista og batt enda á tíu leikja taphrinu Lakers

Kobe Bryant spilaði eins og árið væri 2006 en ekki 2016 þegar Los Angeles Lakers komst loks aftur á sigurbraut í NBA-deildinni í körfubolta í nótt.

Lakers, sem var búið að tapa tíu leikjum í röð, vann fjögurra stiga sigur á Minnesota Timberwolves á heimavelli sínum, 119-115. Með því forðaðist liðið að bæta lengstu taphrinu liðsins frá upphafi, en Lakers hafði ekki tapað tíu leikjum í röð frá 1994.

Kobe setti sjö þrista í nótt úr ellefu skotum og lauk leik með 38 stig, fimm fráköst og fimm stoðsendingar á 33 mínútum, en hann hitti úr 10 af 21 skoti sínu í heildina og setti niður ellefu af tólf vítaskotum.

Louis Williams hjálpaði til með 20 stig, en hjá gestunum frá Minnesota var Andrew Wiggins stigahæstur með 30 stig. Spænski leikstjórnandinn Ricky Rubio skoraði 10 stig og gaf 15 stoðsendingar.

Lakers-liðið er eftir sem áður rótfast við botn vesturdeildarinnar. Kobe og félagar eru aðeins búnir að vinna 10 leiki af 51 og eru fjórum leikjum á eftir Minnesota sem er sætinu fyrir ofan þá.

James Harden var svo í miklu stuði fyrir Houston Rockets í nótt þegar liðið vann Miami Heat á heimavelli, 115-102. Harden jafnaði eigið met í NBA-deildinni og gaf 14 stoðsendingar í leiknum.

„Hann spilar leikinn svo fallega. Hæfileikar hans eru vanmetnir. Fólk sér hann bara skora og skora en það sér ekki það sem hann býr til fyrir samherja sína,“ sagði J.B. Bickerstaff, þjálfari Houston, eftir leikinn.

Harden var einnig stigahæstur hjá Houston í leiknum með 26 stig en Josh Smith kom næstur með 19 stig. Hjá gestunum frá Miami skoraði allt byrjunarliðið yfir 13 stig en stigahæstur var Dwayne Wade með 1 stig.

Úrslit næturinnar:

New York Knicks - Boston Celtics 89-97

Houston Rockets - Miami Heat 115-102

Phoenix Suns - Toronto Raptors 97-104

Portland Trail Blazers - Milwaukee Bucks 107-95

Los Angeles Lakers - Minnesota Timberwolves 119-115

Staðan í deildinni.