Hart barist síðustu daga

Aðskilnaðarsinnar í austanverðri Úkraínu sögðust í gær vera búnir að ná flugvellinum í Donetsk aftur á sitt vald.

Harðir bardagar hafa geisað síðustu daga. Sameinuðu þjóðirnar telja að meira en 4.700 manns hafi látist í átökunum í austanverðri Úkraínu frá því í apríl síðastliðnum. Bardagar hafa haldið áfram þrátt fyrir samning um vopnahlé sem samþykktur var í september.

Utanríkisráðherrar Evrópusambandsins ræddu ástandið í Úkraínu á fundi sínum í Brussel í gær og ákváðu að refsiaðgerðum yrði ekki aflétt í bráð gegn Rússlandi, vegna stuðnings Rússa við aðskilnaðarsinna.