Taka upp plötu á Íslandi

Norska tríóið Splashgirl er nú statt í Reykjavík að taka upp nýja plötu með upptökustjóranum Randall Dunn sem búsettur er í Seattle.

Splashgirl er norskt drone-jazz-tríó en meðlimir þess eru Andreas Stensland Løwe, Jo Berger Myhre og Andreas Lønmo Knudsrød.

Hljómsveitin hefur gefið út fjórar plötur síðan 2007, sem hlotið hafa gríðarlega góðar viðtökur. Hún hefur spilað víða um heim, bæði í Evrópu, Bandaríkjunum og Japan, og unnið með tónlistarfólki eins og Sidsel Endresen, Jan Bang, Erik Honoré, Eyvind Kang, Mari Kvien Brunvoll, Randall Dunn og Timothy Mason.

Tríóið ætlar að taka sér frí úr hljóðverinu í kvöld til að koma fram í Mengi og spila í fyrsta skipti nýtt efni sem það er að fara að taka upp í Hljóðrita. Það mun einnig spila lög af síðustu útgáfu sinni, Hubro, Pressure og Field Day Rituals. Tónleikarnir hefjast klukkan klukkan 21.00 í kvöld.