Curry og George leikmenn mánaðarins

Steph Curry, leikmaður Golden State, og Paul George hjá Indiana voru verðlaunaðir af NBA-deildinni fyrir flotta frammistöðu í síðasta mánuði.

Curry var valinn leikmaður mánaðarins í Vesturdeildinni en hann hefur verið óstöðvandi í liði Golden State sem er búið að vinna alla leiki sína í vetur.

Hann er stigahæsti leikmaður deildarinnar með 31,6 stig að meðaltali í leik. Hann er þess utan búinn að setja niður 94 þriggja stiga körfur og er 42 þriggja stiga körfum á undan næsta manni.

George var sá besti í Austurdeildinni en hann er fjórði stigahæsti leikmaður deildarinnar með 27,2 stig að meðaltali í leik. Pacers vann 11 af 13 leikjum sínum í mánuðinum með hann í broddi fylkingar.

George er þess utan með 8,1 frákast að meðaltali í leik og 4,4 stoðsendingar.