Fjármögnun helsta þrætueplið í París

Allt kapp er lagt á að samkomulag náist á loftslagsráðstefnunni í París. Nokkur bjartsýni ríkir, en helsta þrætueplið snýr að því hver eigi að fjármagna baráttuna gegn loftslagsbreytingum, að sögn Kjartans Hreins Njálssonar, fréttamanns Stöðvar 2 og Bylgjunnar, sem staddur er í París.

„Í dag og sérstaklega núna í morgunsárið eru fjölmiðlar og sendinefndir að fara yfir það sem ráðherrarnir sögðu. Fórlk virðist sammála um að þetta hafi svolítið verið undir væntingum, vildu fá meiri festu og meiri stefnumörkun núna þegar seinni vikan er komin á fullt. Þessi seinni vika er svo gríðarlega mikilvæg því endanlegur samningur verður settur saman og margt sem verður á gera á þessum stutta tima sem eftir er,“ segir Kjartan.

Seinni vika loftslagsráðstefnunnar hófst í gær, þegar ráðherrarnir settust yfir drög samningamanna. Samningsdrögin eru tæpar fimmtíu blaðsíður en ágreiningur er um tæp níu hundruð atriði.

„Þegar lesið er yfir samninginn, þessa miklu orðasúpu sem hann er, þá kemur í ljós að helstu þrætueplin snúa að því hvernig tekist verður á við þær loftslagsbreytingar sem munu eiga sér stað. Hver á að borga og fyrir hvað. Hver á að borga þróunarríkjunum sem þurfa að standa í miklum framkvæmdum og dýrum verkefnum til þess að mæta kostnaði vegna lotfslagsbreytinga. En það er alveg klárt mál að þróunarríkin munu fá verulegar fjárhæðir á næstu árum frá alþjóðasamfélaginu, en upphæðirnar eru enn á reiki og ábyrgð þróaðri ríkja sem bera ábyrgð á þróuninni sjálfri,“ segir hann.

Ráðherrarnir eiga gríðarlega erfitt verkefni fyrir höndum. Ráðstefnunni lýkur formlega á föstudag, en búist er við að hún dragist eitthvað á langinn.

„Sendinefndir og samninganefndir eru klárlega á betri stað núna en þær voru árið 2009, þegar þær reyndu síðast að hamra saman þessum samningi í Kaupmannahöfn. Það er mikið verkefni fyrir höndum sem á eftir að dratgast aðeins, en það er í raun hefð fyrir því að svo far á loftslagsráðstefnum.“

Kjartan segir nokkra bjartsýni ríkja.

„Alveg vafalaust. Það er í rauninni þannig að í ljósi þess sem hefur átt sér stað á síðustu tuttugu árum, þetta er tuttugasta og fyrsta ráðstefna Sameinuðu þjóðanna, þannig að við höfum tuttugu sinnum reynt að gera þennan samning en okkur hefur mistekist tuttugu sinnum. Það má ekki gerast og það gera sér fletar þjóðir grein fyrir þvi. Þess vegna var þessi pólitíski vilji sem va svo bersynilegur í fyrri vikunni þegar þjóðhöfðingjar 195 landa komu saman til að segja að við verðum að ná þessum samningi. Ef þessi pólitíski vilji er til staðar og til grundvallar þá verða samningaviðræðurnar auðveldari.“

Kjartan Hreinn mun fara nánar yfir þessi mál í kvöldfréttum Stöðvar 2 klukkan 18.30. Sjá má umfjöllun hans frá því í gærkvöldi í spilaranum hér fyrir neðan.