Nýtt lag með Bubba: Platan er bara unnin með konum

„Ný plata er að koma út, hún heitir 18 konur og er bara unnin með konum,“ segir tónlistamaðurinn Bubbi Morthens sem frumflutti nýtt lag í Bítinu á Bylgjunni í morgun.

Bubbi segir að aðeins konur spili á þessari plötu.

„Þetta er rokk, pönk, popp og folk. Það er meira eða minna verið að syngja um konur á þessari plötu. Ég er að syngja um atburði sem ég hef lesið í blöðunum, andlát fjórtán ára stúlku, þarna er ég að syngja um flóttafólk sem hefur komið til Íslands, ég er að syngja um konurnar sem var drekkt í drekkingahyl, ég er að syngja lag til dóttur minnar og margt fleira.“

Bubbi segir að platan sé bæði hugljúf og rammpólitísk. Lagið Þarna flýgur ríka fólkið var spilað í fyrsta sinn í þættinum og heyra má það hér að neðan.