Meistararnir geta ekki hætt að vinna

NBA-meistarar Golden State Warriors líta vel út og rúmlega það á nýju tímabili, en þeir unnu í kvöld áttunda leikinn í röð og hafa ekki enn tapað í deildinni.

Golden State vann gott lið Detriot Pistons í nótt á heimavelli, 109-95, en Detriot hefur einnig farið vel af stað og er búið að vinna fimm leiki og tapa tveimur.

Skvettubræður; Steph Curry og Klay Thompson, fóru fyrir meistaraliðinu í nótt, en Thompson var stigahæstur með 24 stig. Curry skoraði 22 stig auk þess sem han tók 5 fráköst, gaf 5 stoðsendingar og stal 3 boltum.

Reggie Jackson og Reggie Bullock voru stigahæstir hjá Detroit með 20 stig, en miðherjinn Andre Drummond heldur áfram að spila frábærlega. Hann var með flotta tvennu í nótt; 14 stig og 15 fráköst.

Sixers án sigurs

Á sama tíma og Golden State getur ekki hætt að vinna getur Philadelphia 76ers ekki unnið körfuboltaleik. Það tapaði í nótt sjöunda leiknum í röð, þar af þeim fjórða á heimavelli, þegar Chicago kom í heimsókn og vann örugglega, 111-88.

Nikola Mirotic var sterkur í liði gestanna með 20 stig og 10 fráköst en nýliðinn í liði Sixers, Jahil Okafor, skoraði 21 stig og tók 15 fráköst.

Los Angeles Clippers hafði svo betur í stórleik í vestrinu gegn Memphis Grizzliez, 94-92, þar sem Blake Griffin átti stórleik og skoraði 24 stig og tók 12 fráköst.

Zach Randolph skoraði 26 stig og tók 10 fráköst fyrir gestina frá Memphis sem eru búnir að vinna þrjá leiki og tapa fimm í byrjun tímabilsins.

Úrslit næturinnar:

Indiana Pacers - Orlando Magic 97-84

Philadelphia 76ers - Chicago Bulls 88-111

Atlanta Hawks - Minnesote Timberwolves 107-117

Denver Nuggets - Portland Trail Blazers 108-104

Sacramento Kings - San Antonio Spurs 88-106

Golden State Warriors - Detriot Pistons 109-95

LA Clippers - Memphis Grizzliez 94-92