Birgir Leifur spilaði sinn besta hring en er úr leik

Birgir Leifur Hafþórsson úr GKG spilaði sinn besta hring á lokaúrtökumóti fyrir Evrópumótaröðina á Spáni í dag en er engu að síður úr leik.

Birgir Leifur spilaði hringinn í dag á 68 höggum eða tveimur höggum undir pari. Hann fékk fjóra fugla og tvo skolla.

Í heildina spilaði Birgir fjóra hringi á þremur höggum yfir pari. Hann spilaði þann fyrsta á fjórum höggum yfir, annan hringinn á pari og var svo á einu höggi yfir pari í gær. Verkefnið fyrir daginn í dag var því risastórt.

Um 70 Kylfingar komast í gegnum niðurskurðinn og spila úrslitahringina tvo, en aðeins 25 fá þátttökurétt á Evrópumótaröðinni á næsta ári sem er sú næst sterkasta í heimi.

Birgir Leifur hefði þurft að spila á sex höggum undir pari í dag til að komast í gegnum niðurskurðinn.

Hér má sjá stöðuna í mótinu.