Svör óskast um RÚV

Viðbrögð við RÚV skýrslunni svokölluðu hafa verið fyrirsjáanleg og borið vott um þá flokkadrætti sem einkenna þjóðfélagsumræðuna.

Lítið hefur farið fyrir efnislegri umræðu um skýrsluna. Þess í stað hefur allt snúist um upphrópanir, þar sem skýrslan er annaðhvort árás gegn RÚV skipulögð af pólitískum andstæðingum eða RÚV ónýtt apparat sem leggja á niður.

Sannleikurinn er væntanlega einhversstaðar þarna á milli.

Margir hafa fallið í þá gryfju að gagnrýna skipan nefndarinnar en þar átti meðal annars sæti Eyþór Arnalds, yfirlýstur sjálfstæðismaður. Í hugum andstæðinga skýrslunnar var þetta augljóst merki um að niðurstaðan hefði verið pöntuð og átt að koma RÚV illa. Þetta sama fólk virðist þó ekki velta því fyrir sér að í nefndinni sátu einnig óháðir sérfræðingar frá fjármálaráðuneytinu annars vegar, og endurskoðandi frá KPMG hins vegar.

Ekki er upplýst hvaða hagsmuni þetta fólk hefur af því að draga upp dökka mynd af RÚV, en fólk ætti ef til vill að hugsa sig um tvisvar áður en það dregur fagleg heilindi þess í efa.

Sömuleiðis hefur verið gagnrýnt að rekstur RÚV hafi verið borinn saman við stærsta einkarekna fjölmiðil landsins, 365 miðla. Einkum á þeim grundvelli annars vegar að tölurnar hafi komið frá forstjóra 365, og hins vegar að ekki sé um sanngjarnan samanburð að ræða í ljósi „almannaþjónustuhlutverks“ RÚV. Aftur er þarna verið að saka fólk um fagleg óheilindi, og umræðan rugluð með vísan í óskilgreint hugtak sem hver túlkar eftir eigin höfði.

Skýrslan sjálf er vel unnin og áhugavert innlegg í umræðuna. Því er miður að fleiri hafi ekki orðið við bón menntamálaráðherra um að fara í boltann en ekki manninn.

Niðurstaðan er hins vegar skýr. RÚV ber sig ekki í núverandi mynd, og þarf annaðhvort að auka tekjustofna eða skera niður þjónustu og yfirbyggingu. Fyrirliggjandi sparnaðaráætlanir eru hvorki fastar í hendi né líklegar til að leysa vandann til frambúðar.

Er því ekki rakið að efna til umræðu um hlutverk og tilvist RÚV til framtíðar? Er öryggishlutverk stofnunarinnar úrelt, og betur sinnt af einkaaðilum? Á RÚV að hætta auglýsingasölu? Er eðlilegt að RÚV teygi sig út fyrir hefðbundið hlutverk sitt og spreyti sig á nýmiðlum á borð við vefsíður eða streymisþjónustu? Svona mætti áfram halda.

Spurningin er ekki bara hvort við eigum að halda áfram að dæla peningum í RÚV, heldur einnig hvers konar RÚV við viljum fá fyrir peningana okkar.

Stjórnarmaðurinn er sigldur innherji með puttann á púlsinum. Stjórnarmaðurinn skrifar í Markaðinn í Fréttablaðinu á miðvikudögum og liggur ekki á skoðunum sínum um menn og viðskiptaleg málefni.