Mickelson ætlar að réttlæta liðsvalið í Forsetabikarnum

Línur eru farnar að skýrast fyrir Forsetabikarinn sem fram fer í Suður-Kóreu í byrjun október en þar mæta Bandaríkjamenn heimsúrvalinu í keppni sem svipar mikið til Ryder-bikarsins.

Fyrirliði bandaríska liðsins er Jay Haas en í liðinu eru stjörnur eins og Jordan Spieth, Rickie Fowler, Bubba Watson og Dustin Johnson.

Haas valdi einnig Phil Mickelson í liðið þrátt fyrir slæmt gengi þessa vinsæla kylfings að undanförnu en hann hefur verið í Bandaríska liðinu 19 mót í röð og er hokinn af reynslu.

Mickelson segir sjálfur að hann muni gera allt til þess að réttlæta valið.

„Ég elska svona liðakeppnir og mun gera það sem ég get til þess að hjálpa liðinu að vinna. Þetta eru alltaf skemmtilegustu helgar ársins fyrir mér.”

Haas valdi einnig son sinn, Bill Haas, í liðið en það voru fáir sem mótmæltu því þar sem hann spilaði sig nánast inn í það með góðri frammistöðu á árinu.

Í liði heimsúrvalsins eru einnig margir sterkir kylfingar, meðal annars Adam Scott, Louis Oosthuizen og Jason Day sem hefur verið í frábæru formi að undanförnu.