Rory kominn í efsta sæti heimslistans á ný | Day blandar sér í baráttuna

Norður-írski kylfingurinn Rory McIlroy er kominn í efsta sæti heimslistans í golfi á ný eftir stutt stopp í öðru sæti. Missti hann efsta sætið til Jordan Spieth í tvær vikur en náði því aftur eftir slaka frammistöðu Spieth um helgina.

Spieth entist aðeins tvær vikur í efsta sæti heimslistans en hann komst ekki í gegn um niðurskurðinn á Barclays meistaramótinu um helgina. Missti hann fyrir vikið sætið til McIlroy sem tók ekki þátt í Barclays mótinu að þessu sinn til þess að gefa meiddum ökkla hvíld.

Ástralski kylfingurinn Jason Day gæti náð toppsætinu af kylfingunum tveimur um næstu helgi takist honum að bera sigur úr býtum á Deutsche Bank meistaramótinu í Boston um næstu helgi en allir þrír kylfingarnir eru skráðir til leiks. Day náði með sigrinum á Barclays-mótinu að saxa á forskot Spieth og McIlroy og gæti með sigri á Deutsche Bank mótinu náð toppsætinu í fyrsta sinn á ferlinum.

Yrði það enn ein rósin í hnappagatið hjá Day sem sigraði sitt fyrsta risamót á dögunum og fylgdi því eftir með sigri á Barclays mótinu. Yrði hann nítjándi kylfingurinn sem kemst í toppsætið frá því að listinn var settur fram árið 1986.