Formaður GKB ósáttur | "Viljum fá afsökunarbeiðni frá GSÍ“

Golfklúbbur Kiðjabergs sendi frá sér fréttatilkynningu í gærkvöldi á heimasíðu sinni þar sem ákvörðun Golfsambands Íslands um að flýta leik GKB og Golfklúbbsins Jökuls í úrslitum um sigurinn í 2. deild í sveitakeppni GSÍ var gagnrýnd. Kylfingarnir úr GKB voru ekki til staðar í upphafi hringsins og var Ólafsvíkingum dæmdur sigur á fyrstu þremur holum vallarins.

Samkvæmt yfirlýsingu Golfklúbbs Kiðjabergs fengu hvorki liðsstjóri liðsins né leikmenn GKB að vita af þessari ákvörðun mótanefndar GSÍ en leiknum var flýtt um klukkustund. Snorri Hjaltason, liðsstjóri GKB, var skiljanlega ósáttur með þessa framkomu mótsnefndar.

„Þegar ég fór úr golfskálanum í gærkvöldi, spurði ég formann mótanefndar sérstaklega, hvenær rástími okkar væru á morgun og hann svaraði, ég veit það ekki en held að hann verði sá sami. Ég fór því út í bíl og kíkti í möppuna mína, sem ég fékk á liðsstjórafundinum, og sá að rástíminn var þar settur klukkan 10:06.  Ég var því með það á hreinu að við ættum að hefja leik klukkan 10:06 eins og auglýst hafði verið. Síðan er þessum tíma flýtt um klukkustund án þess að láta okkur vita,“ sagði Snorri á heimasíðu klúbbsins en Jóhann Friðbjörnsson, formaður GKB, tók í sama streng.

„Það þekkist ekki í neinni íþróttagrein að liðsstjóri skuli ekki vera látinn vita ef um breytingar á leiktíma eða öðru er að ræða hjá viðkomandi liði. Þetta er bara óafsakanlegt og við viljum fá afsökunarbeiðni frá GSÍ og mótanefnd. Það var einfaldlega ekki rétt staðið að málum í þessu sambandi og það bitnaði illilega á okkar liði.“

Haukur Örn Birgisson, forseti GSÍ, staðfesti síðar við Vísi, að verklag mótastjórnar yrði skoðað á næstu dögum en hann sagði þetta vera leiðinlegan blett á annars góðri helgi.

Golfklúbbur Mosfellsbæjar sigraði í fyrsta sinn í 1. deild í karlaflokki en í flokki kvenna var það sveit Golfklúbbs Reykjavíkur sem stóð uppi sem sigurvegari.