J.R. Smith sjóðheitur þegar Cleveland tók forystuna | Myndbönd

Cleveland Cavaliers tók forystuna í einvíginu við Atlanta Hawks í úrslitum Austurdeildar NBA með átta stiga sigri, 89-97, í fyrsta leik liðanna í nótt.

Lebron James fór fyrir liði Cleveland með 31 stigi, átta fráköstum og sex stoðsendingum. James var sérstaklega öflugur í 2. leikhluta þar sem hann skoraði 14 stig og setti sjö af níu skotum sínum niður.

Staðan var jöfn í hálfleik, 51-51, en Cleveland náði frábærum kafla undir lok 3. leikhluta og í byrjun þess fjórða, þar sem liðið gerði 22 stig gegn aðeins fjórum hjá Atlanta.

J.R. Smith fór mikinn á þessum kafla en hann átti frábæran leik í nótt; skoraði 28 stig, tók átta fráköst og setti niður átta þriggja stiga skot í 12 tilraunum.

Cleveland skoraði 11 fyrstu stig 4. leikhluta og náði 18 stiga forskoti sem Atlanta náði ekki að vinna upp. Lokatölur 89-97, Cleveland í vil.

Jeff Teague var stigahæstur í liði Atlanta með 27 stig en liðið var ískalt fyrir utan þriggja stiga línuna en skotnýting þess fyrir utan var aðeins 17,4%.

Til að bæta gráu ofan á svart fyrir Atlanta fór DeMarre Carroll meiddur af velli þegar fimm mínútur voru eftir af leiknum og kom ekki meira við sögu. Óvíst er hversu alvarleg meiðslin eru.