Plötusnúður túlkar nýtt lag frá Of Monsters and Men

Íslenska hljómsveitin Of Monsters and Men hefur gefið út nýtt myndband við lagið Hunger sem verður á næstu plötu sveitarinnar,  Beneath the Skin, sem kemur út 8. júní hér á landi.

Það er plötusnúðurinn Natalie G. Gunnarsdóttir sem túlkar texta lagsins á sinn hátt.

Sjá einnig: Siggi Sigurjóns fer á kostum í myndbandi Of Monsters and Men: "Of spennandi og skrýtið til að hafna því“

Um er að ræða fjórða textamyndbandið frá OMAM en fyrr höfðu komið út samskonar textamyndbönd við lögin Crystals og I of the Storm og Empire. Siggi Sigurjónsson fór á kostum í fyrsta myndbandinu og þá við lagið Crystals.

Sjá einnig: „Ekki oft sem maður fær svona tækifæri svo ég stökk af stað“

Því næst var komið að Atla Frey Demant sem túlkaði lagið I of the Storm. Leikkonan Guðrún Bjarnadóttir sá síðan um að túlka lagið Empire.

Neðst í fréttinni má sjá öll fjögur myndböndin.

Þann 4. maí hefst tónleikaferð hljómsveitarinnar. Fyrst er förinni heitið til Norður-Ameríku en sveitin heldur síðan til Evrópu í júní.

Önnur breiðskífa Of Monsters And Men kemur út hér á landi þann 8. júní á vegum Record Records.

Platan kemur til með að innihalda ellefu lög þegar hún kemur út erlendis en hér á landi, og á viðhafnarútgáfum, munu lögin Backyard og Winter Sound bætast við. Þau verða því alls þrettán.

Síðasta ári hefur sveitin varið í Los Angeles og á Íslandi með upptökustjóranum Rich Costey sem hefur meðal annars unnið með sveitum á borð við Muse, Foster The People og Death Cab For Cutie.

Síðan fyrsta plata sveitarinnar kom út hefur leiðin legið upp á við og hljómsveitin spilað á fjölmörgum hátíðum víða um heim. Einnig hafa lög hennar heyrst í kynningarmyndböndum meðal annars fyrir iPhone 5 og The Secret Life of Walter Mitty auk þess að lagið Silhouetts var sérsamið fyrir kvikmyndina The Hunger Games: Cathing Fire.

Lagalisti Beneath the Skin:

Crystals

Human

Hunger

Wolves Without Teeth

Empire

Slow Life

Organs

Black Water

Thousand Eyes

I Of The Storm

We Sink

Backyard

Winter Sound