Ágúst hættir með Valskonur

Ágúst Björgvinsson verður ekki áfram þjálfari kvennaliðs Vals í Dominos-deildinni en hann hættir með liðið eftir fjögurra ára starf.

Ágúst þjálfaði báða meistaraflokkana hjá Val síðustu fjögur tímabil en það er ekki enn ljóst hvort hann haldi áfram með karlaliðið.

Ágúst staðfesti við Vísi að hann sé hættur með kvennaliðið sem og að hann sé í viðræðum við Valsmenn um framhald hans hjá karlaliðinu.

Valskonur komust tvisvar í úrslitakeppnina undir stjórn hans þar sem þær töpuðu tvisvar í oddaleik í undanúrslitunum og þær komust líka einu sinni í bikarúrslitaleikinn. Valsliðið varð síðan Lengjubikarmeistari haustið 2013.

Karlaliðið Vals sat eftir í undanúrslitum umspilsins um laust sæti í Dominos-deildinni i vetur og kvennalið Vals endaði í 5. sæti eftir að hafa tapað á móti Grindavík í lokaumferðinni í hreinum úrslitaleik um laust sæti í úrslitakeppninni.