Pelíkanarnir fjarlægjast úrslitakeppnina | Myndbönd

Staða New Orleans Pelicans í vesturdeild NBA-deildarinnar í körfubolta er orðin erfið eftir tap liðsins gegn LA Clippers í nótt, 107-100.

New Orleans er í tíunda sæti deildarinnar með 37 sigra, einum sigri á eftir Phoenix sem vann afar mikilvægan sigur á Dallas í nótt, 98-92. Oklahoma City er svo í áttunda sætinu með 40 sigra.

Blake Griffin skoraði 23 stig í leiknum í nótt, sem og Chris Paul sem bætti við ellefu stoðsendingum. Þetta var fjórði sigur Clippers í röð en liðið refsaði grimmt fyrir hver mistök sem New Orleans gerðu.

Gestirnir töpuðu boltanum alls átján sinnum í leiknum en Anthony Davis var stigahæstur þeirra með 26 stig auk þess sem hann tók tólf fráköst. Hann hafði misst af síðustu tveimur leikjum á undan vegna ökklameiðsla.

Oklahoma City vann Miami, 93-75, þar sem Russell Westbrook náði sér í sína tíundu þreföldu tvennu. Hann var með tólf stig, tíu fráköst og sautján stoðsendingar. Enes Kanter var þó stigahæstur með 27 stig, þar af fimmtán í fyrsta leikhluta.

Miami er enn ekki öruggt með sæti í úrslitakeppninni austanmegin. Liðið er í sjöunda sæti með 32 sigra en Charlotte, Boston, Indiana koma næst með 30 sigra og Brooklyn með 29.

Cleveland er þó í góðri stöðu í öðru sætinu í austrinu en liðið vann Milwaukee í nótt, 108-90. LeBron James skoraði 28 stig og JR Smith 23 en Cleveland hefur nú unnið þrjá leiki í röð.

Atlanta, langefsta lið austurdeildarinnar, tapaði hins vegar fyrir meisturunum í San Antonio sem er í sjötta sætinu í vestrinu með 44 sigra, jafn marga og Dallas og Portland. Tiago Splitter var með 23 stig fyrir San Antonio sem hefur unnið þrjá í röð.

Þá mættust tvö gömul stórveldi sem eru bæði í næstneðsta sæti sinna deilda. LA Lakers úr vestrinu vann Philadelphia úr austrinu, 101-87, þar sem Jeremy Lin skoraði 29 stig fyrir Lakers sem komst á 20-4 sprett í fjórða leikhluta.

Úrslit næturinnar:

Milwaukee - Cleveland 90-108

Oklahoma City - Miami 93-75

Atlanta - San Antonio 95-114

LA Clippers - New Orleans 107-100

Toronto - New York 106-89

Sacramento - Washington 109-86

Boston - Detroit 97-105

Orlando - Denver 100-119

Minnesota - Charlotte 98-109

Phoenix - Dallas 98-92

LA Lakers - Philadelphia 101-87