800 miðar á Bræðsluna seldust upp á nokkrum mínútum

Miðasala fyrir tónlistarhátíðina Bræðsluna á Borgfirði eystra hófst í gær og má segja að það sé mikill áhugi fyrir henni í ár. Átta hundruð miðar seldust upp á nokkrum mínútum. Heiðar Ásgeirsson er einn af skipuleggjendum hátíðarinnar en hann segir hátíðina eiga sér tryggan kúnnahóp sem er í startholunum á hverju ári fyrir miðasöluna til að endurupplifa stemninguna.

Einhverjir gætu metið það svo að eftirspurnin á hátíðina sé svo mikil að aðstandendur hennar þurfi að íhuga að auka framboð á miðum en Heiðar segir ekki vilja til þess. „Við getum ekki og viljum ekki fjölga miðunum því húsið og samfélagið bjóða ekki upp á fleiri gesti. Við viljum að fólk upplifi þarna skemmtilega helgi, það er það sem vakir fyrir okkur, segir Heiðar en þó nokkuð margir leggja leið sína til Borgarfjarðar þó svo að þeir séu ekki með miða á hátíðina.

„Það er þó nokkuð mikið af fólki sem kemur bara til að upplifa stemninguna og vera með. Kannski einn í fjölskyldunni eða vinahópnum sem á miða og þeir koma saman og upplifa góða helgi. Það er mikil stemning þarna í kring og alveg hægt að segja að rúmlega annað eins sé þarna af gestum sem ekki eru með miða.“

Bræðslan var fyrst haldin árið 2005 og komu þá fram Emilíana Torrini og Magni Ásgeirsson en síðan þá hefur henni vaxið fiskur um hrygg og varð ákveðin sprenging í fjölda gesta þegar Damien Rice kom fram á hátíðinni árið 2008 og hefur aðsóknin haldist stöðug síðan að sögn Heiðars.

Hátíðin í ár verður haldin 25. júlí og koma fram hljómsveitirnar Valdimar, Ensími, Prins Pólí, Bubbi og Dimma, Prins Póló og Lára Rúnars.