Haukarnir unnu uppgjör bestu liðanna | Myndbönd

Atlanta Hawks vann uppgjör bestu liðanna í NBA körfuboltanum á heimavelli í nótt.

Engin lið hafa leikið betur en Atlanta Hawks og Golden State Warriors í NBA í vetur. Bæði lið hafa aðeins tapað 9 leikjum eftir að Hawks vann leik liðanna í nótt 124-116.

Klay Thompson skoraði 29 stig fyrir Warriors og Stephen Curry 26 en það var liðsheildin og breiddin hjá Hawks sem réði úrslitum.

Alls skoruðu 7 leikmenn Hawks 11 stig eða meira í leiknum en Jeff Teague skoraði mest, 23 stig. Paul Millsap skoraði 21.

Indiana Pacers stöðvaði 12 leikja sigurgöngu Cleveland Cavaliers þegar Pacers vann 103-99 sigur á heimavelli.

C.J. Miles skoraði 26 stig fyrir Pacers og David West og George Hill 20 stig hvor. Kyrie Irving skoraði 29 stig fyrir Cavaliers og LeBron James 25. Kevin Love skoraði 5 stig í leiknum.

Anthony Davis hafði betur í mögnuðu einvígi sínu gegn Russell Westbrook þegar New Orleans Pelicans lagði Oklahoma City Thunder 116-113.

Westbrook skoraði meira, 48 stig og gaf 11 stoðsendingar en það var Davis sem tryggði Pelicans sigurinn í nótt með ótrúlegri körfu sem má sjá hér að neðan. Davis skoraði 41 stig í leiknum og tók 10 fráköst. Tyreke Evans skoraði 22 stig fyrir Pelicans og Kevin Durant 27 fyrir Thunder.

Ricky Rubio skoraði 8 stig á tveimur síðustu mínútunum þegar Minnesota Timberwolves vann tíunda sigur sinn á leiktíðinni í nótt. Úlfarnir lögðu Memphis Grizzlies með minnsta mun 90-89.

Rubio skoraði 17 stig og nýliðinn Andre Wiggins 18. Hjá Grizzlies skoruðu Jeff Green, Marc Gasol og Mike Conley 15 stig hver.



Úrslit næturinnar:

Brooklyn Nets – New York Knicks 92-88

Indiana Pacers – Cleveland Cavaliers 103-99

Orlando Magic – Los Angeles Lakers 103-97

Toronto Raptors – Los Angeles Clippers 123-107

Atlanta Hawks – Golden State Warriors 124-116

Boston Celtics – Philadelphia 76ers 107-96

Detroit Pistons – Denver Nuggets 98-88

Houston Rockets – Milwaukee Bucks 117-111

Minnesota Timberwolves – Memphis Grizzlies 90-89

Oklahoma City Thunder – New Orleans Pelicans 113-116

Phoenix Suns – Utah Jazz 100-93

San Antonio Spurs – Miami Heat 98-85

Hill með ótrúlegan þrist: Barátta Westbrook og Davis: Sigurkarfan hjá Davis: Hvítur maður sem getur hoppað setur hvítan mann á veggspjald: