Juventus rúllaði yfir Emil og félaga

Carlos Tévez skoraði tvö mörk þegar Juventus vann stórsigur, 4-0, á Verona í síðasta leik dagsins í ítölsku úrvalsdeildinni í kvöld.

Paul Pogba kom Ítalíumeisturunum yfir strax á 3. mínútu og aðeins fjórum mínútum bætti Tévez við öðru marki.

Staðan var 2-0 í hálfleik en Roberto Pereyra og Tévez bættu við tveimur mörkum á átta mínútna kafla í seinni hálfleik.

Með sigrinum náði Juventus fimm stiga forystu á toppi deildarinnar en Roma, þeirra helsti andstæðingur í toppbaráttunni, gerði jafntefli við Palermo í gær.

Emil Hallfreðsson lék síðustu 14 mínúturnar í liði Verona sem er í 14. sæti deildarinnar með 21 stig.